Granarolo comporat Podda: aMpI "unu colossu italianu si ndi liat unu de is prodotus mellus de s'ecunumia nostra"

(IlMinuto) – Casteddu, 13 de su mesi de làmpadas - S'est concruiu su 27 de su mesi de maju passau s'acórdiu intre s'azienda de su casu, Podda de Casteddu e sa Granarolo Spa, azienda cuntrollada de unu cunsórtziu de 1.000 produtoris: su 77,48% de su Grupu est in is manus de su Cunsórtziu Granlatte, su 19,78% de is azionis est de Intesa San Paolo, su chi abarrat, est a nai su 2,74% est gestiu de Cooperlat. S'acórdiu intre is duus nòminis de su lati iat a depi ponni in is manus de Granarolo su 65% de s'impresa de Podda, firmendi unu convéniu chi no praxit a sa manca indipendentista sarda de a Manca pro s'Indipendentzia, chi commentat :"Unus cantu, is chi a oi acusant is efetus de s'imbriaghera natzionali apurida de is 150 annus italianus, tzerriant giai a una nàscida a nou de s'ecunumia sarda. Imbecis nos no si dda seus bufada, e arraxonaus in modu fridu e issentíficu, teneus un'àteru modu de ligi custa nova". "Asuba de is industrialis 'sardus' ddoi est de nai meda, biu puru ca issus impitant su macru sardu scéti si ddis fait cómodu". Difatis, "is Pinna - sighit aMpI - iant a depi amparai su macru arveghinu, biu chi ndi cuntrollant su cunsórtziu - ma faint cuncurréntzia a su mantessi casu fadendiddu in Romania cun lati in prúiri. Sa birra Ichnusa est de sa Heineken comenti puru su licori de muta est unu prodotu sardu gestiu in Milanu". Impignada in sa lota contra a is megamercaus e po su fàbricu de unu polu de soberania económica in Nùgoro, a Manca pro s’Indipendentzia afirmat chi s'isperdítziu económicu de sa Sardigna acontessit primu de totu po mori de "is políticus de is partidus italianus chi funt setzius in Regioni" e chi "traballant cun impignu po destruiri s'ecunumia sarda e po dda tramudai cun s'Italiana e cun sa multinatzionali, comenti is segreterias de Roma ddis cumandant, est nai comenti bolint is acórdius pigaus in Bruxelles o is diretivas de su Fmi, ponendi cun incuru a una parti s'acotzu a is aziendas sardas".