Progetu Lianora. De Seneen donat audiéntzia a sa Saras

(IlMinuto) – Casteddu, 19 de su mesi de làmpadas - Est prevìdia po oi, martis 19 de su mesi de làmpadas, s'atopu de sa Comissioni Ambienti de sa Provìntzia de Aristanis. S'atóbiu est stétiu dimandau craru craru de su Presidenti de sa Giunta provintziali Massimiliano De Seneen po ascurtai sa presentada de su Progetu Lianora de sa sotziedadi Saras . "Una dimanda foras contu - comentat su Comitau Cívicu No a su Progetu Lianora - ma prusatotu chi no arrespetat a su Comitau e a s'opinioni pública totu, chi de otu mesis gherrat po frimai custa àtera intentzioni de afàriu e de arriuna ambientali apitzus de su territóriu de sa Sardigna". Sa sotziedadi de is Moratti, de sèmpiri ausenti a is atopus públicus aprontaus cun is tzitadinus de Arborea e de sa Provìntzia, pedit audiéntzia a su presidenti De Seneen: "No bideus nisciuna arrexoni poita sa sotziedadi depat otèniri un'ascurtu po presentai su progetu a sa Comissioni ambienti - pretzisat su comitau - sa sotziedadi at giai fueddau in totus is domus chi spetant cun sa presentada de su primu istúdiu ambientale". "Su documentu - si ligit in d-una nota de imprenta - rapresentat sa boluntadi de sa sotziedadi, [...] est giai stétiu ligiu e analizau de milli e prus de milli tzitadinus e de is istitutzionis, medas de custas si funt espressadas contra a su Progetu Lianora". Amentaus, difatis, ca su Ministeru de s'Ambienti e sa Regioni Sardigna, in su mamentu chi ant espressau is avaloramentus asuba de su progetu, ddu ant giudicau mancanti in diversus puntus. "Po custu - acrarat sa nota - est de foras de contu su cumportamentu de su Presidenti De Seneen".