Recuberu istipéndius consilleris Ras. Zuncheddu: "no mi abarràt àteru ca sa renúntzia argumentada cun d-una declaratzioni de votu"

(IlMinuto) – Casteddu, 22 de su mesi de làmpadas - "No mi abarràt àteru ca sa renúntzia argumentada cun d-una declaratzioni de votu". Est cantu afirmat Claudia Zuncheddu, consilleri regionali indipendentista, ingíriu a s'atacu arrepenti, acontéssiu de su 12 de su mesi de làmpadas passau, po torrai a ponni is istipendius de is consilleris regionalis, cuntantu ca su 6 de su mesi de maju passau is sardus si siant espressaus in faori de s'abolitzioni de s'artículu de lei chi previdit su rimbussu fintzas a s'80% de is ispesas de is rapresentantis in Consillu. Sa mudífica asuba de su recuberu de sa paga de is consilleris regionalis, in su puntu duuu narat: "su rimbussu de càrria est irminorigada de su 20%". Est apitzus de custu puntu ca su consilleri de SardignaLibera s'acrarat: "Asuba de su rimbussu de càrria, personalmenti pentzu ca no depat essi irminorigau, ma liau totu, aici comenti apu nau de sa primu diri de sa legislatura", mentris " asuba de s'irminorigamentu de su 20% de su istipéndiu, api tentu su dúbiu chi ddoi fessat calencunacosa pagu crara poita prevediat su càlculu apitzus de du dinai pigau in su 2003 e no asuba de s'istipéndiu de su 2012". No sendu consillera in su 2003, "no podiu connosci su totali de is rimbussus de cussus annus,  in pagu minutus meda de sa presentada e de sa votatzioni afatanti, no mi furiat possíbili connosci sa mannària de s'irminorigamentu", po custu, sighit Zuncheddu "Votai ca eja po mimi iat essi nau aprovai sa mudífica, votai ca no […] iat essi stètiu votai contra su printzípiu de irminorigamentu de is costus de sa política […]. No apu lassau s'àula, poita apu pentzau ca in cussu mamentu fessat sa domu giusta po manifestai su própriu pentzu políticu chentza de si fuiri de is próprius responsabilidadis".