"Sa solidariedadi est un'arma. Nisciunu depit abarrai a solu". In Casteddu assembrea contra a su fascismu po nai ca no a su scontróriu

(IlMinuto) – Casteddu, 14 de su mesi de làmpadas - Chistionai impari de comenti iat essi mellus agiudai is antifascistas casteddaius chi su 25 de su mesi de arbili passau, in pratza Gramsci, circànt de s'opòniri a chini afestàt is nazifascistas de Salò e chi imoi funt possíbilis destinatàrius - comenti narant diversas novas de s'imprenta - de unu decretu penali de cundenna. Puntat a custu s'atopu avisau de su Cordinamentu antifascista casteddaiu po cenàbara 22 de su mesi de làmpadas a is 18.00 in pratza Santu Giacu in Casteddu. Agoa de su chistionu at a sighiri una cena a oferta