Su Prc Sardigna eligit a Alessandro Serra a segretàriu nou

(IlMinuto) – Casteddu, 19 de su mesi de làmpadas - Funt acabaus domínigu passau is traballus de su VIII regionali de sa Rifondatzioni Comunista. Aprovau a majoria de un'assembrea de incarrigaus, a pabas de una proposta de s'ex segretàriu Laura Stochino, "unu determinu políticu chi impignat su partidu in su progetu de su fàbricu de unu sogetu 'plurale' de manca sarda". Custu sogetu "bolit fueddai - si pretzisat in d-una nota de imprenta fata connosci de su Comitau políticu regionali Prc Sardigna - a is partidus organitzaus de sa manca autonomista e indipendentista sarda chi cundividant cun is comunistas s'abisóngiu de binci a custu sistema económicu capitalista". Una diri cumpria sa chi at serrau su congressu. Is incarrigaus ant difatis elìgiu su comitau políticu regionali de su partidu, chi agoa at elìgiu a su segretàriu regionali nou, Alessandro Serra. Serra, 25 annus, consilleri provintziali de su Campidanu de Mesu, at ghiau po tempus meda su Círculu Prc de Serrenti. "In sighidura cun su protzessu de rennou de is grupus dirigentis - acrarat Rifondatzioni Comunista - su cumpanzu Serra at pigau unu cunsensu mannu meda e seus prexaus de pretzisai ca [...] est su segretàriu regionali prus giòvanu de sa Sardigna".