Caserma de Pradu. aMpI "Sa lota populari no s'at a frimai!"

(IlMinuto) – Casteddu, 30 de su mesi de argiolas - "[Medas] pentzant ca unu fatu siat acontéssiu diaderus poita est imprentau in líteras nieddas mannas; cunfundint sa beridadi cun su mesura doxi". Est cantu, in su 1952, scririt su Borges de "Àteraa incuisitzionis". Un'ocasioni útili po atuai asuba de unu comunicau de imprenta fatu connosci de a Manca pro s'Indipendentzia a propositu de su giornalismu o de unu tzertu tipu de giornalismu. Su referimentu est a unus cantu de artículus bessius in is diris passadas in is giornalis, chi cun malítzia parrint essi "acusatorius",  artículus bessius a pustis de sa lítera anónima cun amaletzus de morti arricia de su síndigu de Nùgoro Alessandro Bianco. "Cundennaus cun fortza e cun arrealia - scririt sa manca indipendentista - s'ambiguidadi chi ant tentu in custas diris is giornalis, chi, chentza de tenni atrevimentu de s'arringherai e de fueddai cun craresa, circant asuta asuta de donai sa crupa de is amaletzus (misteriosus in su chi ddoi est iscritu e in s'apróliu) a s'area populari manna chi de diversus mesis lotat contra a s'isperdítziu inútili e chentza de torrada chi iat a portai su fàbricu de sa Caserma. Nos is cosas ddas naraus in faci!!". "Est po custu chi s'auguraus - pretzisat sa nota de imprenta - ca sa lítera anónima cun amaletzus de morti recapitada a su síndigu in is diris passadas no siat s'arreghèscia po creai unu clima de abusu in is cunfrontus de su disacórdiu. Sa protesta contra a su fàbricu de una Caserma in Pradu est stétia populari [...] de sèmpiri, fata de is tzitadinus nugoresus abertamenti e a sa luxi de su sobi, cun volantinagius públicus, manifestadas e arregorta de firmas in is pratzas". Si iaus a podi preguntai, sighenti s'anàlisi fata connosci de sa manca indipendentista, si s'agataus diaderus a faci de cussu modu de fai políticu conotu comenti "Strategia de sa tensioni" de sèmpiri conota comenti strategia de sa contrarivolutzioni preventiva. Nos no scideus arrespundi. Beru est perou ca in Nùgoro dógnia prova de scuncórdiu, dógnia protesta no parrit cumparri comenti un'atu lezítimu, ndi est esémpiu s'episodiu de is gavetonis aprontaus de su comitau tzitadinu C.A.N contra a su foghidoni de is líburus in pratza, protesta inditada comenti atu de violéntzia. Un'atu, acrarat galu aMpI, chi in manera illegitima est stétiu acapiau a s'opositzioni contra a sa Caserma de Pradu, ponendi impari "fatus de su totu iscapus, chi si pretendit de arranguai no asuta de sa categoria de su 'disacórdiu' ma ssuta de cussa diversa meda de sa 'voléntzia'". Una cosa est segura: a una primu carrellada lestra su clima no si parrit de is prus asseliaus

Disegnu de Dott. Fonk