Gigantis de Mont'e Prama. Pdci: "Pregantai custa àtera befa a is dannus de territóriu"

(IlMinuto) – Casteddu, 9 de su mesi de argiolas - Agoa de sa cundierra chi unus cantu de diris fait est stétia artziada de su Comitau naturali "Gherradoris de Mont’e Prama" contra a su síndigu de Crabas Cristiano Carrus, chi at firmau un'acórdiu chi previdit sa cumpartzidura de is Gigantis de Mont’e Prama intre Casteddu e Tàtari, asuba de sa chistioni fueddat puru, cun d-una nota de imprenta, sa segreteria de su Pdci. "Su Ministeru po is benis e is fainas culturalis - afirmat su segretàriu Alessandro Corona - [...] est fadendu un'aerru mannu meda a pratziri su beni de Monti Prama. [...] S'atzioni nascit de is políticas de su guvernu Berlusconi, cun su ministru Bondi, cun su supermanager Mario Resca e sa sotziedadi Arcus, ogetu de diversas inchiestas. Su 'volume finaziario' po s'operatzioni est adecuau, e po custu at essi difítzili a dda frimai". Obietivu de sa lota contra a sa cumpartzidura est torrai a su territóriu de nàscida su "beni comunu". Puru su Pdci-Federatzioni de sa Manca Sardigna si declarat duncas contra a custa divisioni definendidda "aerru issentíficu e atacu a sa renascida de is territórius nostrus fundada asuba de sa cultura e de s'ambienti, apitzus de is benis comunus a issa collegaus".