S'Universidadi de Tàtari contra a sa discriminatzioni de su sardu. Su cuntentu de Su Majolu

30 Argiolas 2012
Image
sumajolu-202x300.jpg

(IlMinuto) – Casteddu, 30 de su mesi de argiolas - Sighit sa protesta contra a sa discriminatzioni de sa língua sarda bófia de su guvernu italianu. S'Universidadi de Tàtari puru, atressu de una delíbera de su Senau Académicu, at espressau su pentzu suu denuntziendi s'atacu malu a su sardu. Comenti scideus sa Spending Review (d.l. 95/12, art. 14, Irminorigamentu de is ispesas de personali, coma 16) at difatis liau sa Sardigna de is areas chi tenit particularidadi linguìstica. In su decretu lei asuba de sa "rimodulazione" de s'ispesa no ddoi est difitas nisciunu amparu po su sardu mancai siat sa mantessi lei 482 de su 1999 a ddu amparai comenti língua a su própriu livellu de su tedescu, de su francesu e de su slovenu. Ma ita est acontessendi? Si sa Spending Review istabilidit ca in Sardigna no ant a podi essi assignaus dirigentis a tempus indeterminau a is istitutzionis iscolàsticas chi tenint de mancu de 600 iscritus, sa cosa prus grai est ca su provedimentu ndi liat s'ísula de is areas cun particularidadi linguìstica, po is calis si aplicat su númeru minimu de 400 iscritus comenti acontessit in su Sud-Tirolo, in sa Valle d'Aosta e in is areas de língua slovena de su Friuli. Un'esclusioni chi at apensamentau a sa Comissioni de s'ateneu po sa língua sarda de s'Universidadi de Tàtari, chi at signalau luegu su "scornu" a su Senau Académicu. Custu, atressu de delíbera, at pediu chi bengat arraspetada sa lei 482/99, chi insertat su sardu intre is línguas de minoria amitias a amparu. Unu determinu chi bit su prexu de is istudiantis de s'assótziu Su Majolu: "S'arrexoni de s'importàntzia de custa delíbera de su senau académicu - scrirint in d-una nota de imprenta - est ca si parrit chi cumentzint a recòsciri ca sa língua sarda est unu istumentu de reclamu políticu i económicu. In fortza de essi unu pópulu chi tenit un'istória, una cultura e una língua comuna [...] depeus pretèndiri chi bengant arraspetaus is diritus chi giai si tocant segundu s'ordinamentu vigenti e depus lotai poita si bengat reconotu su diritu de istruturai is istitutzionis iscolàticas e universitàrias nostras e is caminus de imparu nostrus puru". Est conotu s'impignu de Su Majolu po donai gabali mannu a sa língua sarda. Unus cantu de mesis fait difatis, is membrus de s'assótziu iant presentau a su Retori Attilio Mastino una petitzioni firmada de milla istudiantis e prus de s'Ateneu tataresu innoia si fadiat dimanda po s'aviamentu de duus cursus de laurea po formai maistus e profesoris in sa didàtica de su sardu. Una proposta chi a oi no at tentu galu arrepusta. "Isperaus - si ligit in sa nota de imprenta fata conosci de s'assótziu - ca s'Universidadi de Tàtari potzat torrai a contu cun nos ca si est zustu a si bati asuba de sa particularidadi linguìstica nostra po allogai unus cantu de postus de traballu de dirigenti iscolàsticu, est galu de prus donai a sa língua nostra sa dignidadi chi ddi minescit  reconoscendi ca su sardu depit lompi a tenni sa mantessi dignidadi de s'italianu in totus is campus de sa vida pública de sa Sardigna, a cumentzai de is iscolas e de is Univesidadis, cun su númeru mannu puru de postus de traballu nous chi custu iat a donai".


© RIPRODUZIONE RISERVATA