A pustis de su votu de su Consillu regionali asuba de sa Ratìfica de su Tratau europeu asuba de is línguas de minoria, su fueddu a Su Comitadu

(IlMinuto) – Casteddu, 6 de su mesi de austu - Est satisfau meda su Comitadu pro sa limba sarda po su votu a cuncórdiu de cida passada espressau de su Consillu regionali, chi at aprovau s'odg indiritzau a su Parlamentu po afiantzai livellus giustus de amparu de sa língua sarda po sa ratìfica de sa Carta europea de is línguas de minoria, aici comenti pervìdiu in s'artículu 51 de su Statutu Sardu. "Su Comitadu pro sa limba sarda - si ligit in d-una nota de imprenta - est satisfau meda poita sa campagna sua cumentzada cun sa lítera oberta a su Presidenti Napolitano de su 19 de su mesi de fiàrgiu chi dimandàt un'interventu suu a manera chi fessat fiamenti ratificada sa Carta de is línguas regionalis e de minoria at tentu arrembumbu e assensu, acabendi po imoi cun su votu a cuncórdiu de su messàgiu a su Parlamentu prevìdiu de s'art. 51 de su Statutu autónomu nostru". Una batalla, cussa fata de Su Comitadu in faori de sa chistioni linguìstica, chi no s'est frimada mai poita de sèmpiri bia comenti agu de importu de sa Chistioni sarda. Sa campagna est stétia afortiada puru cun sa denúntzia de sa supressioni de sa língua sarda "de sa possibilidadi de su 'ricalcolo' prus favoràbili de s'irminorigamentu iscolàsticu, previdiu po is minorias linguìsticas istóricas de sa Spending review". No funt perou totus luxis is chi brillant. Comenti si pretzisat in su comunicau, "Su Comitadu pro sa limba sarda pentzat chi siat negativu ca su Consillu regionali no apat postu in discussura s'odg votu n. 197 puru po s'abolitzioni, 'in sede di conversione', de su coma 16 de s'artículu 14 de su decretu lei n. 95 de su 2012 (Spending review) po evitai un'irminorigamentu de is autonomias iscolàsticas in Sardigna (aici comenti prevìdiu de s'artículu 51 de su Statutu sardu)". Asuba de sa violatzioni de is diritus costitutzionalis de sa minoria linguìstica sarda Su Comitadu est aprontendi una denúntzia a su Consillu d'Europa po s'obertura de una procedura de volatzioni de s'Acórdiu "quadro" de parti de su Stadu italianu.