A Manca pro s’indipenpedentzia versus Monti in difesa de su Km zeru

(IlMinuto) - Casteddu, 9 de su mesi de ledàminis - S'avaloramentu de tzircúitus de su logu atressu de arretzas curtzas, arretzas naturalis, arretzas agro-energeticas po s'organizatzioni noa de sa distributzioni e de su cumérciu de is prodotus est oi útili po unu consumu atuau chi agiudat su produsidori e su consumadori. Seus duncas a petus de unu diàlogu de importu mannu intre consumadoris e messajus chi torrendi a promovi unu modellu istérriu de colturas chi cumbenint de prus e chi funt de calidadi favoressit is tzircúitus de consumu de su logu, donendusì de fai no scéti in is restorantis traditzionalis, ma in sa restoratzioni colletiva puru. Est in difesa de su Km zeru e de su mercau agroalimentari sardu ca a Manca pro s’Indipendetzia, cun d-unu documentu longu e analìticu denuntziat su traballu de Mario Monti: "Mario Monti, su Presidenti de su Consillu de is Ministrus italianu [...] at presentau recursu in Cassatzioni a scàpitu de sa messarítzia a Km 0.Ddu at fatu primu contra a Calabria, faltosa (po Monti) de ai decretau leis in prus de is cumpeténtzias suas. Po su Guvernu difatis, sa lei regionali calabresa tenit normas chi favoressint a su cumérciu de is prodotus de su territóriu, i est po tanti de impedizu a sa líbera circulatzioni de is mercis, andendu contra a is printzípius comunitàrius". Unu provenimentu chi at obertu unu caminu, biu ca agoa de pagu tempus sa Basilicata puru est stétia ferta de su provedimentu, e ca - pretzisat sa manca indipendentista - parrit scuntroriai su Ddl "Normas po s'avaloramentu de is prodotus agriculus chi benint de arretzas curtzas e de calidadi" aprovau de su Consillu de is Ministrus su 1 de su mesi de martzu de su 2010. "Su recursu totu italianu - scririt aMpI - duncas tenit s'iscopu craru de liberai su campu a is multinatzionalis de calisisiat tipu de cuncurréntzia [...]. Su propositu de su guvernu est ladinu: sdorrocai is aziendas de su logu, ispèrdiri s'organismu sotziali de is zonas innoia su cumpartu agroalimentari est balu de importu mannu, po fai diventai a su pópulu desintotu dipendenti de istruturas extraterritorialis e de is multinatzionalis chentza de cuscéntzia".