"Monti no s'as a agangai". In Casteddu sit in asuta de àcua contra a sa política económica de su Guvernu

(IlMinuto) – Casteddu, 30 de su mesi de ledàminis - Fueddus diversus ma obietivu comunu: frimai a Mario Monti. Sàbudu a meigama in Casteddu funt stétias una centina is personis chi ant manifestau in Pratza Costitutzioni po nai ca nou a is arretzetas económicas de su Guvernu. Dinai liau a sa sanidadi, a s'istrutzioni, a is serbítzius públicus, aumentus de is tassas cun efetus malus meda apitzus de sa perra prus débilis de s'ísula. Asuta de s'àcua ant protestau impari is ativistas de su Casteddu Social Forum, de su Cumitau "Gettiamo le basi" de s'Usb, de su círculu Togliatti de su Pdci (in disacórdiu cun su segretàriu Oliviero Diliberto), de su Colletivu Marxista Leninista de Nùgoro, de su Pcl e de Sinistra Critica sarda. "Is arretzetas económicas chi ant agangau a sa Grecia - acrarat su Casteddu social forum - ant a agangai aici a nos puru comenti agagant de dexennius a is istadus africanus e asiaticus". "Ispesa Monti, guvernint is traballadoris. Su Guverni 'ténnicu' de is industrialis e de is bancheris - si ligit in su giornali de Pcl - est cumpletendi su traballu brutu contra a is traballadoris e a sa populatzioni pobera". Degógliu sotziali chi Sinistra critica sarda - si ligit in d-una nota de s'organizatzioni anticapitalista e indipendentista - proponit de cumbàtiri ponendi impari "sa denúntzia de is políticas colonialis de su Guvernu a s'unidadi de is lotas de is traballadoris, de is istudiantis, de is disimperaus e de is precàrius".