Pópulu ainnantis : sighit sa martza de sa Consulta Rivolutzionària

(IlMinuto) - Casteddu, 22 de su mesi de ledàminis - Sa Consulta Rivolutzionària infervorat a su pópulu de is traballadoris sardus. Nàscia difatis comenti istrumentu de lota populari, s'organizatzioni bolit rapresentai a is milla e prus de milla traballadoris sardus unius de unu programa e de unu obietivu comunu: su de fundai un'area de cunfrontu, de adesioni e de participatzioni populari chi aceddat in Sardigna a totus is tzitadinus, a is movimentus e a is organizatzionis sotzialis e produtivas. In pagu fueddus po donai boxi a totus is sardus, poita onniunu potzat pigai parti cun is próprius propostas a fabricai una Sardigna noa, un'ísula chi castit a modellus nous de isvilupu chi remplasint a is disusaus chi ant portau a su pópulu sardu in s'isprofundu. "Sa Consulta - si ligit in pàgini facebook de su grupu - proponit de èssiri unu laboratoriu permanenti e giranteri chi favoressat s'arrexonu colletivu". De sa creatzioni sua difatis, sa Consulta at presentau su própriu progetu e is puntus de su programa suu - Soberania Energetica, Soberania alimentari, Soberania fiscali, fundai un'Agentzia sarda de is Intradas, fundai is zonas líberas de is datzius e fundai una política noa de is Portus, Soberania de sa mobilidadi, Soberania ambientali - in is diversas comunidadis e ddu at fatu cun s'iscopu de amadurai custu sogetu rivolutzionàriu nou. Is assembreas territorialis in abetu de s'assembrea manna populari pública de su 7 de su mesi de totussantus (Casteddu 9.30 in bia Roma a petus de su palatzu de sa Regioni), sighint cun is atopus de Igrèsias, su 23 de su mesi de ledàminis a is 19.00 in sa saba Lepori de arruga Isonzo, e de Nuràdda, su 24 de su mesi de ledàminis a is 19.00 in sa Zona Artesanali - Istatali 197 a faci de su distribudori Tamoil. Giai in su manetessi tempus de s'assembrea de su Surcis, su 23 a is 18.30, in Nùgoro sa manca indipendentista at a presentai in sa própriu domu in arruga Aurelio Saffi 12 is propostas de sa Consulta rivolitzionària a is simpatitzantis e a is traballadoris de sa zona