"In pratza in Casteddu po nai ca nono a su digógliu sotziali de su Guvernu coloniali". Sinistra Critica Sarda a su No Monti Day

(IlMinuto) – Casteddu, 22 de su ledàminis - "Nai ca nono a su digógliu sotziali de su Guvernu coloniali e oligàrchicu de Mario Monti". Cun custu obietivu Sinistra Critica Sarda pigat parti a su No Monti Day e a sa manifestada in programa su meigama de su 27 de su mesi de ledàminis in Casteddu. "Cun s'agiudu de sa dereta de tzentru e de sa manca de tzentru - si ligit in su comunicau de imprenta de s'organizatzioni anticapitalista e indipendentista - su Guvernu ghiau de Monti est acabendi cun d-una malesa e unu cìnismu chentza precedentis un'atacu a su welfare state, siddendi in su mantessi tempus is cadens de s'istadu 'centralistico' apitzus de sa Sardigna. Su Guvernu coloniali Monti negat difatis, cun s'introdutzioni de sa clausula de primatzia costitutzionali, dógnia aficu de soberania a su pópulu sardu". "Una manuvra a tanalla - sighit sa nota - chi podit essi bullada scéti acapiendi sa denúntzia de is políticas chi disignant po sa Sardigna su rolu de colonia sempiterna de s'Istadu italianu  a s'unidadi populari de is lotas de is traballoris, de is istudiantis, de is disimperaus, de is precàrius". "Sa Sardigna - concluit Sinistra Critica Sarda - si ndi depit iscapiai de custa tanalla, chi iat a finiri po dda aguantai comenti no est mai acontéssiu in d-una suciarra mortali. Depit duncas andai ainnantis in su própriu caminu po s'indipendéntzia, sceberendi de contai in  is próprius fortzas e in is próprius atuamentus in su terremotu de su capitalismu globali".