Su crancu fetianu de is traballadoris sardus: arribat su lissentziamentu Energit

22 Ladàminis 2012
Image
energit-300x97.jpg


(IlMinuto) - Casteddu, 22 de su mesi de ledàminis - Contiendas asuba de contiendas apitzus de sa chistioni de su traballu in Sardigna. Créntias chi perdint sànguini asuba de is pabas de is traballadoris de s'ísula, chi perdint su traballu insoru po mori de industrialis chi cun lebiesa declarant s'acabu de s'atividadi insoru. Est sa fini chi oi tragat a is traballadoris de sa Energit, sotziedadi ativa in su mercau líberu de s'energia elétrica fundada in Casteddu in su 2000 comenti multiutility e chi contat oindì 62 traballadoris. In su 2006 sa sotziedadi est stétia pigada de su grupu Alpiq (insaras Atel), importanti multinatzionali de s'energia cun domu in Isvitzera. In is primus mesis de su 2012 Alpiq at comunicau de bòliri serrai s'atividadi de Energit in Itàlia intru de su 31 de su mesi de paschixèdda de su 2012. "In custa fasi - si ligit in d-unu comunicau unitàriu de Slc-Cgil, Fistel-Cisl e Uilcom-Uil - Alpiq at cumentzau is proceduras po sa béndida de sa sotziedadi fadendi totu una fibera de atzionis chi fadiant arreselai ca s'obietivu beru de Alpiq fessat, intamis de lompi a una béndida de Energit cun totus is traballadoris suus a un'ateru sugetu industriali interessau a dda pigai, sa licuidatzioni de sa sotziedadi". Un'ategiamentu cunfirmau - acrarant is sindacaus - "de su fatu ca is diversus operadoris chi ant manifestau interessu a dda pigai, funt stétius totus, po arrexonis chi no cumprendeus, bullaus". Un'acontéssia chi s'est concluia cun anneu su 19 de su mesi de ledàminis passau cun su fallimentu de s'acórdiu intre is partis chi at tentu comenti cusseguéntzia lestra su lissentziamentu de totus is traballadoris de Energit. Un'atopu po su cali is traballadoris ant pediu un'interventu de is istitutzionis. Sa pregunta est stétia aghillia de s'Assessori a su Traballu de sa Provìntzia de Casteddu Lorena Cordeddu e de s'Assessori a s'Industria de sa Ras Alessandra Zedda puru. "S'impegnu de is istitutzionis Provìntzia e Regioni - acrarant is sindacaus - est su de pediri un'atopu a su Ministeru de s'Isvilupu Económicu po aviai is cuntatus cun sa Alpiq cun s'iscopu de agatai una solutzioni a su problema grai meda de su traballu chi s'iat a benni a creai in su territóriu sardu".


Fotografia de Giofilo. Pigada de Flickr


© RIPRODUZIONE RISERVATA