Su Colletivu de is istudiantis Antonio Gramsci s'arrebellat e ocupat

(IlMinuto) - Casteddu, 19 de su mesi de totussantus - Funt is 20.43 de cenàbara 16 de su mesi de totussantus candu in redatzioni lompit unu comunicau de imprenta firmau Colletivu de is istudiantis Antonio Gramsci. Chini ddoi est a pabas de custa firma? Ddoi funt is piciocus de su litzeu Classicu De Castro de Aristanis, giòvanus in lota po unu tempus benidoris prus bellu. "In custus iscàmpius su Colletivu de is istudiantis Antonio Gramsci at ocupau a su Litzeu Classicu De Castro" - si podit ligi in sa nota de imprenta - "Agoa de is manifestadas ispantosas e mannas de su 14 de su mesi de totussantus chi ant iscutuau a totu s'Europa, eus amostau sa fortza de is pretesas nostras chi boleus sighiri a mandai ainnantis po totu s'atóngiu e prus". Is giòvanus pigant in manu sa situatzioni, blocant is letzionis e cumentzant s''autogestione' e s'ocupatzioni de s'Istitutu. Ddu faint po si ndi torrai a pigai su chi ddis est stétiu liau de is políticas de privatizatzioni: "Boleus frimai a su progetu de lei Aprea, acotzau in manera bipartisan, - afirmant in sa nota de imprenta - chi permitit s'intrada de is privaus in is iscolas nostras, amenguat a is diritus de is istudiantis, 'deregolamenta' a is assembreas de Istitutu e 'balcanizza' a s'iscola pública asugetendidda una borta po sèmpiri a sa lei de Mercau". "Is políticas de oindì no pertocant scéti a sa vida nostra aintru de s'iscola - sighint is istudiantis - ma a totu sa vida nostra, sa línia de austerity, su dinai liau ferrit a totus is serbítzius públicus possíbilis e precaritzat galu de prus a is vidas nostras". Is piciocus artziant sa conca e narant ca nono a unu sistema chi est isperdendi a su tempus benidori insoru: "Custa fasi abisongiat de un'unidadi de atzioni forti intre istudiantis, maistus e totus is traballadoris in lota e po custu eus a traballai in custu sensu". Su Colletivu Antonio Gramsci no iscarescit nimancu su chi ant patiu isistudiantis su 14 de su mesi de totussantus passau, is giòvanus de su DeCastrono si ndi iscarescint de is "cumpangius" insoru de lota chi funt stétius càrrigaus e arrestaus e a custus istudiantis espressant totu sa solidariedadi insoru afirmanedu determinaus ca "Su disacórdiu no si ponit in galera!".