Faint goal is assótzius ecologistas chi aciufant a sa tzetrali eolica offshore a faci de s'Asinara

(IlMinuto) – Casteddu, 3 de su mesi de paschixèdda - Dógnia tanti una nova bella. Su progetu propostu de sa sotziedadi aostana Seva s.r.l. po su cumprimentu de una tzentrali eolica off shore in su Grofu de s'Asinara no s'at a fai. A ddu detzíderi est stétia sa Seva etotu, chi biu is cuntestaduras "formalizzate" at determinau de ndi liai a sa dimanda. Is atus de cuntestadura presentaus de is assótzius ecologistas Grupu de Interventu Giurídicu, Amigus de sa Terra e Lega po s'Abolitzioni de sa Cassa contra a su progetu chi istrupiàt meda ant fatu goal. A faci de custa bitória is oposidoris si declarant prexaus. Su "apenas istransiu - si ligit in su giassu ofitziali de su Grupu de Interventu Giurídicu - est un'àtera pàgini de ispeculatzioni eolica in Sardigna: de 27 tzentralis eolicas chi ddoi funt (453 MW de poténtzia), si fessant fabricadas is àteras 34 in abetu de permissu, s'iat a lompi a 61 parcus eolicus cun 1.265 MW de poténtzia". "Si pentzaus - sighit sa nota de imprenta - chi oi s'ísula est totucantu autónoma a petus de a sa retza natzionali. Podit contai in sa poténtzia fabricada de prus o mancu 2.200 MW, puru impitendindi solitamenti dógnia diri 1.730 (e su noti scéti 1.300). Cun s'aumentu de is trasportus atressu de cavu (SAPEI e SACOI) intre sa Sardigna e sa Penísula, no nd'ant a podi essi esportaus prus de 1.000 MW. Chi fait profetus, duncas, poderendu incungiaus àterus 800 MW de s'eolicu? De seguru no sa colletividadi".

Fotografia de jhderojas. Pigada de Flickr