"Mesi de is diritus Umanus": in Casteddu su forum asuba de su disarmu nucleari

(IlMinuto) – Casteddu, 6 de su mesi de paschixèdda - Po su "Mesi de is Diritus Umanus" s'Istitutu Buddista Soka Gakkai cun s'agiudu de su Dipartimentu de Isciéntzias Sotzialis e de is Istitutzionis de s'Universidadi de is Istúdius de Casteddu aprontat su forum asuba de su disarmu nucleari in sa primu tzitadi de sa Sardigna. "Disarmu nucleari? Unu caminu possíbili" est su tema de s'atopu chi s'at a tenni su 7 de su mesi de paschixèdda chi benit de is 18.00 a is 20.00 in s'àula Teatru de s'ex Istitutu Tzurpus in arruga Nicolodi 104. Reladoris: Annamaria Baldussi, maista de Istória de s'Asia in sa Facoltadi de Isciéntzias Políticas e Vinicio Busacchi, circadori de Filosofia Teorètica in sa Facoltadi de Filosofia. At a cordinai su forum su giornalista Walter Falgio. Su forum fait parti de sa campagna po su disarmu nucleari chi s'Istitutu Soka Gakkai mandat ainnantis de duus annus cun su nòmini de "Chentzatomica, mudai s'ispíritu umanu po unu mundu líberu de is armas nuclearis".