Mórigu Carbosulcis. Is apinnicus de Sinistra Critica sarda

(IlMinuto) - Casteddu, 10 de su mesi de paschixèdda - Sa situatzioni de sa Carbosulcis no fait dromiri sonnus asseliaus a s'organizatzioni indipendentista e anticapitalista Sinistra Critica Sarda. A apensamentai s'iscuadra indipendentista noa est sa figura ambígua de su diretori generali nou de sa Carbosulcis Mario Porcu, presidenti puru de sa Sotacarbo, sotziedadi "partecipata" Regioni-Enea chi tenit su cómpitu de presentai su progetu craboni límpiu. "Mario Porcu – afirmat Sinistra Critica Sarda – fintzas a oi at presentau po Carbosulcis scéti progetus afrentosus e disastrosus". "De su Consillu regionali de su 18 de su mesi de cabudanni de su 2012 - si pretzisat - est lómpiu un'infossamentu de su management: est stétia aprovada una proposta chi previdiat a s'istresiada de is chi funt a capu de sa Carbosulcis (Mario Porcu puru). Un'atu políticu forti a su cali no funt sighius, fintzas a oi, atus cuncretus". Furiat su 6 de su mesi de argiolas de su 2012 candu s'iscuadra indipendentista denuntziàt a sa situatzioni pagu crara chi ddoi est in Carbolsulcis. In su mantessi mesi beniant fatas connosci is tzifras de is pagas de is "'super-manager', ma in sa listra presentada de su Ministru Patroni Griffi no ddoi furiant is muntonis e is incàrrigus dópius. Epuru funt medas is manager chi asumant incàrrigus e pagas fintzas a lompi a réditus a ses tzifras Sinistra Critica sarda no cuat apinnicu e arrennegu po s'acontéssia de sa Carbosulcis e po su tempus benidori suu pagu seguru: "pentzaus ca is primus responsàbilis de custa situatzioni [...] siant su guvernu italianu e sa Regioni Sardigna azionista de s’azienda" e - afortiat s'organizatzioni política anticapitalista e indipendentista – "sigheus a si dimandai comenti mai Mario Porcu est galu Diretori generali de sa Carbosulcis".

Fotografia de Mario Fornasari. Pigada de Flickr