Documentu: isceberaus su sardu in iscola po fillus nostrus. Apellu de a Manca Pro s'Indipendentzia

25 Gennàrgiu 2013


Sa leze italiana 482 de su 1999 (artìculu 4, paràgrafu 5) riconnoschet a totus sos babbos e sas mamas sardas su diritu de isseperare si cheren chi lis imparen su sardu in iscola a sos fizos.


Isetande chi su pòpulu sardu apat sa soberania pro pònnere a òbricu su sardu e sas àteras limbas de Sardigna in totus sas iscolas e apat su potere de organizare sas iscolas de Sardigna cussiderande petzi sos bisonzos e sos interessos suos, depimus impreare custa leze pro lis facher imparare su sardu in iscola a fizos nostros.


In prus de deche annos sun istadas pacas sas iscolas chi an rispetau custu diritu de sas mamas e de sos babbos sardos, ca nemos at fatu rispetare sa leze e ca nen sas iscolas e nen sos mèdia an fatu ischire a sas famillias chi an custu diritu.


Ocannu, pro sa prima borta, s'Ufìtziu Regionale de sas Iscolas at rispetau sa leze e at mandau una lìtera a totus sas iscolas de Sardigna nàndeli chi depen pònnere s'optzione pro isseperare s'imparu de su sardu in sos mòdulos pro iscrìvere sos pitzinnos pro s'annu 2013/2014. Tando, dae ocannu, sas famillias poden isseperare in su mòdulu de s'iscritzione de lis imparare su sardu a sos fizos pro s'annu ch'intrat (b'at tempus finas a su 28 de frevarju).


Su chi nos timimos como est chi nen sas iscolas e nen sos mèdia lis facan ischire a sas famillias chi an custu diritu, e chi su bilinguismu dat vantàggios mannos pro imparare sas àteras limbas e totus sas matèrias e fintzas pro s'isvilùpu cognitivu de sos pitzinnos.


A Manca pro s'Indipendèntzia pedit a totus sas mamas e a sos babbos sardos chi pretendan s'imparonzu de su sardu in iscola pro sos fizos! Est a gratis e est unu diritu riconnotu dae sa leze.


Est de importu mannu ca de gai lis sezis dande a fizos bostros sa possibilidade de imparare su sardu in iscola, pro lu faveddare e fintzas pro lèghere e iscrìere: su chi s'istadu nos at proibiu a nois.


E de gai lis semus nande a s'istadu italianu chi semus unu pòpulu chi no at a lassare chi morjat sa limba sua.


Comintzamus nois, chin custu issèperu, a picare cussèntzia e a fravicare un'iscola sarda chi siat fata pro sos interessos e pro sos bisonzos de sa zente nostra.


Mutimus a totus sos indipendentistas, sos natzionalistas e sos istudentes sardos pro liu fàchere ischire a sas famillias in totus sas biddas de Sardigna, in modu chi podan pretèndere sos diritos issoro.


a Manca pro s'Indipendèntzia




© RIPRODUZIONE RISERVATA