ProgReS versus Tendas: "su Síndigu de Aristanis no podit nai de "no essi informau"

(IlMinuto) – Casteddu, 3 de su mesi de arbili - Espressat trambúliu ProgReS - Progetu Repùblica Aristanis a faci de is dichiaras fatas de su Síndigu de su Pd Guido Tendas ingíriu a su Progetu Lianora de sa Saras S.p.A. "Su Progetu Lianora no est unu problema de Arborea ma est unu problema de sa Provìntzia de Aristanis e de sa Sardigna totu", - afirmat in d-una nota de imprenta ProgReS - pretzisendi ca "sa mantessi Saras at amítiu ca si su Progettu fessat arrenesciu at a cumetzai is pertusamentus e is bogaduras in àturus logus de sa Sardigna". A faci de unu comitau de tzitanus chi gherrant in difesa de su própriu territóriu de su 2011 e a is assótzius de categoria comenti Coldiretti e Confagricoltura, de acórdiu po su No a su Progetu de is Morati, a faci de una fita manna de su sistema produtivu de sa provìntzia de Aristanis, assolutamenti contrària a is pertusamentus dirigius a sa bogadura de su gas metanu, e a organizatzionis políticas chi comenti ProgReS funt ativas de un'annu e prus intre is tzitadinus e is istitutzionis po pediri sa bulladura de su mantessi progetu, su síndigu de Aristanis andat contras a su territóriu de Arborea, a s'ecunumia de sa tzitadi chi guvernat e a sa provìntzia totu. Is problemas chi iant a nasci de un'eventuali pertusamentu, difatis, no iant a arresparmiai nisciunu bículu de terra. "Isperaus - si ligit in d-una nota firmada de s'organizatzioni indipendentista - ca su Síndigu de Aristanis biat cantu primu totus is arriscus chi iat a podi fai s'aprou de su Progetu Lianora e avisit in is diris chi benint unu Consillu Comunali po deliberai s'arrialia de s'aministratzioni [...] a su Progetu Lianora, aici comenti ant giai fatu su Consillu Provintziali de Aristanis (cumbidau puru de su Consilleri ProgReS Sebastian Madau) e dexi comunus de sa mantessi provìntzia, intre is calis ddoi funt aministratzionis aundi traballant indipendentistas de Progetu Repùblica, comenti Terraba e, úrtimu su de Baulau, chi at deliberau su 27 de su mesi martzu passau".