Cunferéntzia Saras in S'Othoca de Aristanis. Is Cobas Iscola Aristanis pedint craresa a su Presidi Frongia
Image
(IlMinuto) – Casteddu, 10 de su mesi de maju – Sa Saras aprodat in iscola. S'est isboddiada difatis mércuris passau, in s'Istitutu Ténnicu Othoca de Aristanis, una cunferéntzia asuba de su Progetu Lianora tanti cuntrau de sa populatzioni sarda, su mantessi, ddu amentaus, chi previdit sa circa de idrocarburus po 4430 ètarus de territòriu in sa provìntzia de Aristanis. Apitzus de s'iscera "didàtica" pigada de s'istitutu fueddant is Cobas Iscola Aristanis, amentendi ca s'iscola pùblica si fundat asuba de is printzìpius de sa libertadi de s'imparamentu, chi est unu printzìpiu costitutzionali e duncas in osservàntzia de custu printzìpiu "un'iscola depit podi fabricai situatzionis didàticas o de iscedas asuba de calisisiat argumentu chi a giudìtziu de su professori e in su campu de su traballu iscolàsticu potzat arricai s'oferta de amaistramentu "in senso lato": calisisiat argumentu de is aparéssidas de sa Madonna a sa pornografia, de s'icona de Garibaldi a is fusilamentus de Bronte, de is antibiòticus a is armas chìmicas etc". Sa chistioni, duncas, po su sindacau no pertocat sa mudìfica de s'isboddiamentu normali de su traballu curricolari de diversas classis e de diversus maistus in faori de unu tema de importu mannu comenti est su de is pertusamentus chi ant a andai a ferri su territòriu, e no pertocat - marcant is Cobas - "s'iscera oberta de una relata a sa crara de parti, candu benit donada a unu ténnicu de sa Saras e chentza contradditòriu: totu custu podit infùndiri contrariedadi o disdeni puru, ma est de su totu lècitu o balit po totu o est unu bellu fingimentu". Sa chistioni perou est un'àtera, acrarant is Cobas Iscola Aristanis in d-una nota - "e no pertocat s'ogetu de sa cunferéntzia ma su sugetu chi dda at determinada. Si su sugetu chi dda at determinada est su sugetu titulari de sa funtzioni de profesori, est a nai totus is professoris (Collegiu de is Professoris) o totus is professoris in perra insoru (is professoris de unus cantu classis) no si podit nai nudda asuba de su pranu de su diritu. Si podit fueddai apitzus de su pranu de sa baga e de su modu, e custu difatis abarrat 'virtualmente perfettibile' a cantu pediu de su Cumitau NO Progetu Lianora e a cantu declarau (a dolu mannu a guaiu fatu) de su Presidi de s'Othoca". Endu biu sa circulari chi ordingiat sa cunferéntzia, is Cobas Iscola pedint a su Presidi Frongia, firmadori de su documentu, de fai craresa asuba de un'interrogativu de importu "Sa circulari - marcat difatis su documentu - portat sa data de su 6 de su maju, e tenit duas diris scéti de avertimentu e cun òbligu de registratzioni in is registrus de classi una mudadura de totu su cuadru didàticu po s'8 de su mesi de maju. Custu donat acessu a sa suponidura ca su provedimentu potzas essi pigau no apabas de una pregunta de is professoris, ma chi potzat a su contràriu essi stétiu impostu a is professoris e a is classis insoru po proposta de su presidi etotu". "No est intentzioni de chini scririt - sighit sa nota - seminai malesa asuba de un'acontéssia chi a oi est connota in manera partziali; epuru est in su diritu de chini bivit in s'iscola, de is tzitadinus puru trisinaus in sa chistioni de is pertusamentus, e infinis de s'opinioni pùblica movia de sa crònaca [...] tenni sa disponibilidadi crara de totus is elementus de giudìtziu. Difatis custa est un'acuntéssia de su totu particulari cun sa cali 'fattispecie' sa libertadi de imparamentu (e meda de prus sa dirigéntzia de s'iscola) depit fai is contus a sa marolla".
Fotografia de Carlos Pond. Pigada de Flickr
Fotografia de Carlos Pond. Pigada de Flickr
© RIPRODUZIONE RISERVATA