Online sa petitzioni contra a sa tzitadinàntzia onorària de David Grossman, inimigu de sa paxi

(IlMinuto) - Casteddu, 16 de su mesi de maju - "Sìndigu Zedda istimau Ddi iscriu comenti tzitadinu de Sardigna e de su Mundu cun d-un'apellu iscorau: Ddi prenguntu de si fai frima - e nostra - boxi de un'obietivu de su matessi parri de sodigai sa paxi po ndi fai manera de relatzioni in is comunidadis nostras e in is Natzionis. Custu obietivu m'imponit de Ddi iscriri imoi po Ddi ponni in luxi cantu no siat oportunu su cunferimentu de sa tzitadinàntzia onorària a 'iscritori israelianu David Grossman". Funt custas is paràulas chi oberrint su testu de sa petitzioni online promòvia de su Grupu Falastin contra a su determinu pigau de s'aministratzioni de Casteddu de donai sa tzitadinàntzia onorària a David Grossman. Is chi ant firmau no bogant de duda su traballu literàriu isboddiau de sa pinna de s'iscritori. Su chi perou no praxit e benit arreusau funt is pentzus de Grossman "po su chi riguardat a chistionis polìticas delicas". Marcat su testu de sa petzioni: "Custu cunferimentu iat a arriscai de essi cumprendiu mali trisinendi sa tzitadi in s'intrìciu de un'implìcita cantu grai complitzidadi" Ma ita at fatu Grossman? Grossman, impari cun àterus iscritoris israelianus, in su 2006 at donau totu s'acotzu suu a sa gherra israelianu-libanesa. In prus, s'iscritori, in su 2008-2009, at acotzau s'atacu israelianu in is cunfrontus de Gaza, i est intre is chi negant su Diritu a sa Torrada de su pòpolu palestinesu decretau de is Natzionis Unias. Po custas arrexonis, sa tzitadinàntzia casteddaia a David Grossman parrit totu ma no unu tributu a s'abilidadi sua de iscritori, tenit difatis su sabori marigosi de una prezevolesa polìtica, de un'acotzu indiretu a sa polìtica de Israele.