Sa sotziedadi tzivili arraspundit a Forza Nuova
Image
(IlMinuto) – Casteddu, 29 de su mesi de maju – Sa sotzietadi tzivili arraspundit a su ratzismu "biu" in is iscolas médias de Casteddu. Furiat sa noti intre domìnigu e lùnis 26 de su mesi de maju passau candu unus cantu de rapresentantis de s'organizatzioni polìtica Forza Nuova (“lota de is istudiantis”) ant tancau is ecas de orcaxu de tres iscolas médias de Casteddu, sa Manno, sa Cima e sa Pier Luigi da Palestrina e ant apicau in is bixinàntzias insoru, un'iaxi de bolantinus cun iscritu: "Stop a is rom. Primu is istudiantis casteddaius". No est custa un'acontéssia po a casu ma lompit, ddu amentaus, a pustis de is afrentas e de is amaletzus de morti fatus a su Ministru de s'’Integratzioni e Coperatzioni Internatzionali Cucile Kyenge, e agoa de is paradas anti Rom chi si funt isboddiadas in Bologna. In is iscolas casteddaias is pipius rom funt iscritus e frecuentant is letzionis comenti is àterus pipius. "S'istùdiu e s'iscola - si ligit in d-unu comunicau de imprenta firmau de is assòtzius sardus Dosta - Casteddu Asce e de is romanus New Romalen 'Nazione' Rom - funt su fundamentu de sa cittadinàntzia ativa, caminu atressu de su cali dognunu pigat cuscièntzia de is diritus ,de is doveris, de sa dignidadi, de sa conoscèntzia e de sa sabiduria". Is assòtzius e is organizatzionis Rom impari a sa sotzietadi tzivili denuntziant comenti atu de ratzismu grai, comenti atacu malu a is diritus fundamentalis de is cristianus, is atzionis fatas de Forza Nuova in sa primu tzitadi de sa Sardigna. "Forza Nuova - si ligit in sa nota - fait biri de fai parti tambeni de su mesuevu, perìodu in su cali scéti is arricus podiant istudiai e si podiant annestrai. Un'atzioni chi tenit s'iscopu de cumpratziri a is tzitadinus Casteddaius de is tzitadinus Rom, un'atzioni de demagogia e 'populismo'". A petus de s'acontéssia sa sotziedadi tzivili impari a is assòtzius e a is organizatzionis Rom, pedint s'obertura lestra de unu procedimentu de spricullitu de parti de s'Ufitzius Natzionali "Antidiscriminazioni" Ratzialis. "Atressu de una denùntzia penali in is cunfrontus de Forza Nuova de Casteddu e de su segretàriu natzionali - si ligit - Roberto Fiore pedeus a sa Procura de sa Repùbrica de oberri unu spricullitu po intzullu a s'ódiu de ratza e violatzioni de sa lei Mancino. Est netzessàriu arrasundiri a su ratzismu corpu asuba de corpu atressu s'afirmatzioni de legalidadi e de is diritus umanus: su ratzismu produsit illegalidadi, violèntzia e degradu"
© RIPRODUZIONE RISERVATA