Sa pantàsima de un'àtera tzerachia militari: Su Muos. In Ras interrogatzioni Zuncheddu

3 Làmpadas 2013
Image
muos-300x80.jpg

(IlMinuto) – Casteddu, 3 de su mesi de làmpads – Si lamat Muos, i est sa pantàsima de un'àtera tzerachia militari in Sardigna. Funt difatis "sèmpiri berrinosas is novas, chi lompit siat de is giornalis sardus siat addia de su Tirrenu, chi a cantu narant at essi iminenti s'imponidura de custu progetu in Sardigna puru, e asserru asserru in d-un'artìculu de giornali bessiu in sa 'La Nuova Sardegna' de su 12 de su mesi de maju de su 2013 benit marcau s'arrolu tzentrali atribuiu a su "tzentru de comunicatzioni cun is sutamarinus nuclearis de s''Us Navy di Tavolara' de sa Marina Militari de is Istadus Unius po su progetu". Est cantu marcat su consilleri de SardignaLibera Claudia Zuncheddu, chi impari a is consilleris Cocco, Sechi e Cugusi at presentau in Consillu Regionali un'interrogatzioni cun pregunta de arraspusta iscrita, pedendi beridadi asuba de is possibilidadis de fàbricu de su progetu Muos in s'ìsula. De ita seus chistionendi? Su Muos, sigla impitada po inditai su "Mobile User Objective System", no est àteru ca unu impiantu de comunicatzioni mannu meda de s'esércitu Usa, chi iat a arregalai tambeni una borta, impestadura e maladias a su territòriu sardu. Funt difatis nòidus, gràtzias a is protestas sicilianas de Niscemi de is ùrtimus mesis, is efetus destruidoris de sa cundidura eletromagnetica chi fait su Muos, chi si serbit de unu sistema de comunicatzionis satellitari (Satcom) a continuidai arta meda (Uhf) e a ala istrinta (de da 64 kbit/s a de mancu). Su programa "Mobile User Objective System", ghiau de si Dipartimentu de sa Difesa de is Istadus Unius, previdit su piatzamentu de cuàturu satellitis e cuàturu istatzionis a terra cun iscopus militaris. Aferenamentu de s'ambienti e contracolpus negativus asuba de sa saludi e de sa genti iant duncas essi is prétizius chi sa Sardigna iat a depi pagai po mandai ainnantis is chi funt is interessus  esclusivamenti de is poteris militaris. In su documentu de s'interrogatzioni sa consillera indipendentista marcat ca "in matéria de amparu de is personis sugetas a campus eletromagneticus ddoi funt normativas chi si torrant a fai a is 'livellus de arrelatu' fissaus de s'Icnirp (Comissioni Internatzionali po sa Protetzioni de is Radiatzionis No Ionitzantis, arreconotu de s'Organizatznoni Mondiali de sa Sanidadi) po istabiliri is triminaxus màssimus de amostu a custus campus", e chi, "a custu propòsitu sa normativa italiana puru previdit siat sa Lei 22 de su mesi de fiàrgiu de su 2001 n. 36 - 'Lei cuadru asuba de sa protetzioni de is amostus a campus elétricus, calamidaus, i eletromagneticus', siat su Decretu interministeriali 10 canudanni 1988, n.381 - 'Regulamentu chi tenit normas po sa disposta de is treminaxus de radiofrecuentzia cumpatìbilis cun sa saludi', chi fissat is treminaxus de radiofrecuentzias cumpatìbili cun sa saludi de is cristianus, pighendu in cunsidériu puru de is normas comunitarias". Est famau a totus ca is arrasurtaus de sa circa iscientìfica mondiali in matéria no funt tambeni acraraus, prusatotu po s'entidadi de sa relatzioni de causa i efetu intre esponidura a campus eletromagneticus e patologias de vària nascioni. Po custa arrexoni puru sa consillera Zuncheddu pedit si, "primu de pigai in cunsidériu itasiollat possibilidadi de piatzamentu de unu sistema comenti su de su Muos" innantis no siat oportunu de fai "craresa asuba de custa relatzioni" e apitzus de is "efetus chi ndi giumpint", aici de fai de mancu de creai "sa repitidura de realidadi tràgica chi is populatzionis sardas bivint in is territòrius a aprìgu de is poligonus militaris, innoia po s'impestadura ambientali, s'incidèntzia de patologias tumoralis e no scéti, funt oramai asuta de is ogus de totus". Asuba de sa chistioni benint preguntaus su Presidenti de sa Regioni e totus is assessoris cumpetentis po isciri si siant a conoscèntzia de sa possibilidadi ca su progetu Muos potzat essi impostu in Sardigna puru, pedendi po s'àteru si tenint s'intentzioni de si fai boxi, in is domus oportunas, de s'imponidura de is tzerachias militaris italianas (66%) in s'ìsula e de sa cumpratzidura arbitrària de giassus e poligonus militaris a su contras, a cantu istabiliu de is dipusizionis Ue, e si apant providiu a cumentzai initziativas preventivas cun s'iscopu de no permiti a s'Istadu Italianu e a is poteris militaris de impòniri in Sardigna un'àtera tzerachia.


© RIPRODUZIONE RISERVATA