Una Terra de fortza e solidariedadi. Zuncheddu: una "destrossa, chi po pagu scéti est 'sciacu'"

22 Onniasantu 2013

(IlMinuto) – Casteddu, 22 de su mesi de totussantus - Un'ìsula de solidariedadi, una terra forti chi no mollat mancai totu. Est custa sa fotografia de sa Sardigna agoa de su degògliu chi in is diris passadas at fertu su terròtoriu po mori de su mumujoni Cleopatra. Funt avenimentus fitianus, fillus de s'abandonu e de is afàrius. In faori de is colletividadis fertas si pesat sa boxi de su consilleri regionali de SardignaLibera, Claudia Zuncheddu, chi cumbidat a sa Regioni Autònoma de Sardigna a intzutzulai a su Guvernu italianu po s'arreconoscimentu de su stadu de sciacu naturali po totu s'ìsula. "No pedeus sa limùsina a su Stadu italianu ma s'arreconoscimentu de unu diritu nostru [...] a manera chi is fainas produtivas e artesanalis fertas no andint perdias, fadendi àteru disimpreu e disisperu sotziali". Unu territòriu sbuzarrau, su sardu, prusatotu in is tretus urbanitzaus meda, ma no scéti innia. "Depeus cumprendi ca su territòriu nostru - arremaciat su consilleri indipendentista - est giai cumpromitiu meda de s'urbanizatzioni e de s'edilitzia foras de contu chi ddu ant amanitzau a desacatus idrogeologicus chi faint costus umanus, econòmicus e ambientalis medas prus mannus de su profetu acapiau a is afàrius urbanisticus". Un'arruinu chi s'iat a podi arrapiti si at essi aprovau su Prani Paisagisticu regionali propostu de sa giunta Cappellacci. Su Ppr de is Sardus, aici est stetiu batiau de su Presidenti de sa Regioni, at giai biu pesadas is boxis de diversus assòtziu ambientalistas.


Fotografia de RagaZZa Brucia . Pigadas de Flickr


© RIPRODUZIONE RISERVATA