S'indipendentismu sardu andat a protzessu. A Manca: "s'arrocamentu est recìprocu"

(IlMinuto) – Casteddu, 4 de su mesi de paschixèdda – S'at a oberri su 6 de su mesi de làmpadas de su 2014 in Tàtari su protzessu a su movimentu de liberamentu natzionali sardu. 18 is indipendentistas spreculitaus e mandaus a giudítziu de su Gup Giusepi Pintori. S'acusa fata de su Pm Paolu De Angelis est sa de assòtziu avotoladori. Essi ogetu de unu protzessu polìticu est sèmpiri faddiu. Oi, a pagu mesis de is eletzionis, s'Itàlia si ndi scidat e pigat su determinu, agoa de seti annus de s'Operatzioni Arcadia, de mandai a protzessu s'indipendentismu sardu. Unu protzessu, ddu amentus, chi no si fundat asuba de nisciuna proa cuncreta, ma chi est fabricau totu apitzus de intercetatzionis ambientalis e telefonicas. Diversus nòminis spriculitaus faint parti de s'organizatzioni a Manca Pro s'Indipendentzia, chi cun d-una nota de imprenta cumentat aici su determinu de su Gup: "De annus meda su partidu nostru est fertu de una cassa a is cogas manna meda e de una 'criminalizzazione' chi tenit s'obietivu de destruiri sa strutura nostra e sa mantessi bidea de su sotzialismu de liberamentu natzionali". No est de una diri chi sa manca indipententista mandat ainnantis su caminu suu, fundau asuba de arraxonis istòricas arrexinadas e in difesa de is bisòngius de su pòpolu traballadori sardu. "Sa gherra de liberamentu natzionali e sotziali - pretzisat su comunicau de aMpI - no podit essi scotzeddada a corpus de acanarjaduras giuditziarias, terrorismu mediaticu e presoni preventivu". "Sa manca indipendentista sarda - concluit a Manca - at a sciri fai fronti in custa ocasioni puru a sa brutalidadi de su colonialismu e at a furriai torra is raportus de fortza, mudendi su protzessu contra a s'indipendentismu sardu in d-unu protzessu contra a is crìminis de su colonialismu in Terra nostra".

Fotografia de Francesco Paroni Sterbini. Pigada de Flickr