#acapiaddus Arc Casteddu: solidariedadi a Dessena

(IlMinuto) – Casteddu, 27 de su mesi de fiàrgiu - S'assòtziu Arc de Casteddu espressat solidariedadi e totu s'acotzu suu a Taniebi Dessena, giocadori de su Casteddu. Dessena, ddu amentaus, est diventau ogetu de atacus de parti de unus cantu de "tifosus" po mori de ai pigau parti a su progetu #acapiaddus, campagna contra s'"omo-transfobia" in su sport, chi cunsistit in si ponni una pariga de codrueneddas circuvròngia, de si ponni in is crapitas ipo fai sa gara, po amentai a totus ca in su sport is diversidadis de tratamentu funt "fuorigioco". Est custu su significau de sa proposta fata de "Paddy Power" e de is assòtzius Arcigay e Arcilesbica cun s'agiudu de sa Fondatzioni “Candido Cannavò” po su sport, chi est pighendusì de unus cantu diris is social network cun d-un'hashtag chi est un'incoramentu puru: #acapiaddus, po cumentzai a mudai dessintotu sa mentalidadi nostra, "de aberu no scéti a fueddus". S'Arc torrat gràtzias a Dessena e a totus is sportivus chi ant pigau parti e chi ant a pigai parti a su progetu #acapiaddus, afortiendi aici - si ligit in d-una nota de imprenta - "is diversas propostas chi totu is assòtzius e is organizatzionis pesant dogna diri po sa gherra contra a s'òdiu, a su minisprètziu e s'abusu". Cun s'ispèriu - pretzisat Arc - "chi totu sa scuadra de su Casteddu pighit parti a custa proposta, poita atobiai a sa cosa no significat a essi 'caghineri': significat a essi civilis!"