Acotzu Riformatori Psd’Az a Pigliaru. Manca Sarda: "est una trusada"

(IlMinuto) – Casteddu 7 de su mesi de martzu - "Beneus a isciri ca is Riformatori e su Psd’Az donant, cun d-un'atu de bonucoru mannu meda, donant su pròpriu cuntributu a su Presidenti Pigliaru, assegurendi un'acotzu a is fatus cuncretus chi su guvernadori at essi lamau a fai, po torrai a fai bolai sa Sardigna [...]. No podeus abarrai a sa muda apitzus de is machioris de chini, agoa de ai cuntribuiu in deretura a cincu annus de guvernu malu, pentzat galu de podi contai is palistòrias a is sardus". Funt is fueddus iscritus in d-una nota de imprenta firmata de Giuannicu Deriu e Lisandru Corona de Manca Sarda innoia s'acrarat ca is duus partidus, Riformatori e Psd’Az iant a depi castiai in domu insoru pedendusì comenti mai is sardus apant pigau su determinu de mudai passu e de votai a su centru-manca e su candidau presidenti suu. Est a sa luxi de su votu chi Corona e Deriu difendint s'agenda de su centru-manca, acrarendi ca sa mantessi no tenit abisòngiu de niscinu agiudu, de mancu galu de Psd’Az e Riformatori, giudichendiddu "inùtili e foras de contu". Sa Manca Sarda pretzisat puru ca custus partidus iant a depi torrai contu a totu sa Sardigna "de is operatzionis afrentosas chi sa alliàtzia insoru est mandendu ainnantis in custas diris, fadendi atus foras de contu e malus meda, chi funt su signu ladinu de s'arragu chi tenint de lassai su poteri e de torrai in sa cadira chi est stètia donada insoru de s'arrasurtau eletorali bessiu a pillu de su votu democràticu".