ProgReS - Campidanu de Mesu puru rinnovat is càrigas territorialis
Image
(IlMinuto) – Casteddu, 9 de su mesi de làmpadas - Sa regioni Campidanu de Mesu di ProgReS - Progetu Repùblica de Sardigna puru, agoa de su congressu natzionali de su partidu, chi s'est isboddiau su 4 de su mesi de maju passau, rinnovat is càrigas territorialis. Su responsàbili polìticu chi at acabau su mandau, Simone Lisci, lassat su postu suu a Gabrielli Cossu e a Tanieba Concas. Su bilantzu chi Lisci fait de s'atividati isboddiada in su territòriu est positivu: "In custus annus seus stètius, comenti mi fùriu propostu, presentis asuba de is proas de isfrutamentu de is risorsas de sa terra nostra", afirmat s'ex responsàbili polìticu, amentendi is arragus chi cabant in su Campidanu de Mesu: de s'afàriu energeticu de s'eolicu, a s'isfrutamentu de s'energia termodinamica, a sa geotermica e a is chi dipendit de is "biomasse", fintzas a lompi a is progetus de pertusamentu "esplorative". "Nos no si seus limitaus a sa protesta - pretzisat Lisci - ma eus fatu is propostas nostras agiudendi a fai una cuscèntzia asuba de su valori de is benis comunus e acotzendi a is comitaus chi funt nàscius po ddus difendi". In continuidadi cun su traballu fatu de su coordinamentu passau, is responsàbilis polìticus nous puru ant marcau is lìnia ghia de su madau insoru. Intre is diversus obietivus, sa presèntzia de sa scuadra indipendentista a is aministrativas benientis, chi in su 2015 ant a pertocai Seddori, Guspini e Pabillonis. Responsàbilis polìticus e scuadra funt is novidadis de sa regioni Campidanu de Mesu de Progetu Repùblica. Su coordinamentu nou est fatu de su responsàbili organizatzioni Giordano Corallo (33 annus - Seddori), su responsàbili annestru Màriu Cabriolu (56 annus - Bidda de Cidru), su tesoreri Arricu Mària Porru (28 annus - Bidda de Cidru) e su responsàbili de sa comunicatzioni Nicolau Meloni (35 annus - Santu 'Engiu) torrau a cunfirmai
© RIPRODUZIONE RISERVATA