Unu biàgiu a sa capitale de su Montenegro: Podgorica

(IlMinuto) – Casteddu, su 17 se argiolas - In sa costa adriàtica de sa penìsula balcànica, b'at un'istadu chi costoit bellesas istòricas e artìsticas e una natura ìnnida: Su Montenegro.

Nàschidu dae un'ammisturu de culturas, serbas, montenegrinas e croatas, Crna Gora (chi bolet nàrrere "monte nieddu" in montenegrinu) est una terra rica de muros antigos pesados pro difesa e crèsias catòlicas e ortodossas galanas de a beru.

Dae Lord Byron a Gerorge Bernard Shaw, sunt istados medas sos artistas e sos intelletuales chi ant istimadu sa cultura montenegrina e galu de prus sas bellesas naturales suas, tra montes artos e gorropos fungudos chi sunt a curtzu a una costa istravanada in ue su mare at unu colore de incantu.In su biàgiu tuo bi cheret una bìsita a Podgorica, sa capitale de su Montenegro, chi est a nord de su lagu Scutari.

Su pranu in ue s'agatat sa tzitade est fèrtile meda, fintzas ca lu rugrant duos rios mannos, Mora e Ribnica, e àteros prus minores comente Zeta, Sitnica, Mareza e Cijevna. Su nùcleu de sa tzitade romana fiat Doclea, chi est a 107 metros de artària.

Sa tzitade de oe imbetzes est nàschida in sos annos a curtzu a su milli cun su nùmene de Birziminium, chi in su '400 nche l'ant cambiadu in Podgorica.

Podgorica presentat sas caraterìsticas de una tzitade europea moderna. Est su tzentru metropolitanu e amministrativu de su Montenegru.

Castiende sos edifìtzios suos su turista podet pensare ca sa tzitade siat nàschida dae pagu tempus in sos oros de sos rios Moraca, Ribnica, Zeta, Sitnica, Mareza e Cijevna, ma imbetzes, annotende cun atentzione, si podent reconnòschere sos signos de una traditzione longa: bastat a caminare in una cale si siat carrera de su tzentru istòricu, comente Hercegovacka Street, coro amministrativu, econòmicu e culturale de su Montenegru.

Su tzentru cummertziale est a inghìriu a sa Sloboda, cun sos cafè suos e sas butegas suas.

Podgorica tenet puru unu Teatru Natzionale de importu, chi s'agatat in tzentru a curtzu de su parcu de Lovcen, in ue si podet bìere sa tumba de Njegos, babbu de sa pàtria montenegrina, unu mausoleu sèmplitze ma imponente.

Podgorica est una tzitade rica de cultura, difatis diversas sunt sas gallerias de arte e sos museos chi si podent visitare. Intre custos bos cussigiamus su Muzej grada Podgorice (Ulica Marka Miljanova 4), Museu tzitadinu partzidu in sas bator setziones de archeologia, etnografia, istòria e cultura de su Montenegro, e su Prirodnjacki muzej (Trg Becir-bega), Museu de Istòria Naturale, in ue podides bìdere totu sas ispètzies de sa flora e de sa fàuna montenegrina.

De bìere puru su Most Milenijum, ponte nàschidu in subra de su riu Moraca, sìmbulu de sa tzitade inauguradu su 13 de trìulas 2005, die natzionale Montenegrina in ammentu de sa liberatzione dae s'ocupatzione italiana.

De non pèrdere sa Stara Varos, est a nàrrere sa Tzitade betza, chi costoit galu carchi domo turca cun paritzos fràigos de s’època otomana; sa crèsia de Santu Giorgi, in mesu a sos buscos chi falant dae su montigru de Gorica, e sa Sahat Kula, turre de su relògiu de su setichentos; su ponte betzu de su '400 in subra su Ribnica, ponte chi est in sa rugradura intre Ribnica e Moraca; e finas sas ruinas de su casteddu chi fiat in su logu in ue s’addòbiant custos duos rios.

Ma in ue mandigare? Bos cussigiamus su ristorante, Nin Pod Plocu, in Niksicki pu bb | Gornja Gorica. Inoghe si depent assagiare: biftek, chevapi Schizel, brizle e sos Lignje na žaru.

Pro visitare totu sa tzitade bos cussigiamus de leare su taxi, ca est baratu meda: podides faeddare in inglesu e in italianu puru!

Carta de identidade de su logu

Imàgini de Flickr