Tempiu Pausania. Lu Pagghjolu, calche cosa si moi pa l'Alta Gaddhura

(IlMinuto) – Casteddu, 5 malzu – E' di cumenciu mesi di friagghju la nutìzia chi la RAS, e in palticulari l'Assessoratu a li Trabaddhi Pubblichi, agghja delibaratu a faori di li trabaddhi da la Diga di Lu Pagghjolu a la cittai di Tempiu e l'alti comuni di l'Alta Gaddhura. Comu si sa, a Tempiu bona palti di li disaccelti e inettitudini di lu silviziu idricu è douta puru a lu fattu chi a li timpiesi l'ea 'eni arricata da Pattada. Pa chistu muttiu, una reti idrica chi possia 'unì li 3,3 milioni di metri cubi di Lu Pagghjolu 'eni dummandata da anni, comu da anni ENAS e ZIR hani provvidutu finanziamenti illi bilanci soi. Lu commissariamentu di lu Cunsólziu ZIR ill'ultimi anni ha cumpliccatu no pocu la cosa, com' altettantu ha fattu siguramenti la gestioni e li problemi Abbanoa, cu lu passagghju dalla 'echja gestioni - finz' a lu 2006 - a lu Gestori Unicu. A pocu a pocu in umbè si so finza che sminticati di chiss'opara cussì strategica pa Tempiu e tutta l'Alta Gaddhura.

A ogghji, aspittendi nuitai illi chiti chi venini, si sa chi l'assessoratu ha postu a dispusizioni li residui passivi (spesi previduti ma no ancora pacati) di guàsi dec'anni fa, residui di cuntaduria pubblica di la ZIR e l'ENAS pa più di 4 milioni di euro. Illa delibera n. 5/23 di friagghju, si legghji chi pa la palti chi avanza (boci no uffiziali faeddani di un'opara di 6/7 milioni di euro) l'assessoratu impegna lu Cunsiddu di la RAS a carragghja lu chi manca e pudè finalmenti middurà, si spera lestru, la cundizioni infrastrutturali di Tempiu e l'Alta Gaddhura.

L.P.