Tèmpiu. Tra Paddha e Carrasciali, la dui dì "V'era una 'olta..."

(IlMinuto) - Casteddu, 12 austu - L'ultimu fini chita timpiesu aspittendi mezaustu è statu avvivatu da la "Paddha" e lu Carrasciali d'austu, cun dui dì festa undi si signalani boni nummari di prisenzi tra vennari e sabatu. Una supirioritai di ghjenti e gadagni siguramenti illa primma dì cu la Festa di Paddha timpiesa; chistu forsi pa l'aè cuminciatu la ciurrata abbeddu prima di li deci di sera di lu Carrasciali chi, dunca, ha scuntatu puru l'esse prugrammatu la dì infattu a l'eventu ulganizzatu da li cummelcianti timpiesi. Li prisenzi turistichi e di lu locu, da la sirintina di 'ennari a matinata chizzu di duminica, s'istimani tra li 12.000 e li 13.000 milia.Tra l'attoppi chi ani animatu la dui dì, si signala la Mostra fotografica collettiva "V'era una 'olta, cosi di un altu mundu", illu centru di Corso Matteotti. L'espusizioni ha fattu la so palti cun prisenzi nummarosi - cilca 1000 - e gradimentu da palti di lu pubblicu. Li scatti di ottu fotografi gaddhuresi so stati accumpagnati da testi ispirati a lu trabaddu e lu liamu di sangu cu la tarra e lu ciclo di li stasgioni. Un altu mundu ulmani in palti sminticatu da lu "prugressu" chi aria doutu fa sminticà un mundu di pisti manni e cosi semplici. Un mundu chi, puru illi cuntraddizioni sòziali ed economichi di la modernitai, ogghj agatta forsi ancòra più muttìi pa risistì e fa in manera chi - in più di lu diltimentu, spessu paddhosu e ezzessivu di li timpiesi - si mantenghiani vii li 'alori di la comunitai, di lu rispettu chi polta a invistì innant' a tarra e l'ambienti, e chissi di la linga, cu li parauli liati a li maistrìi e alla ita produttiva di la comunitai.

Lu miletu e la sustanzia di un locu pinsendi - comu ammintantu illu testu di prisentazioni - a fa più tricu e mancu paddha. Datu lu suzzessu di 'ennari, l'espusizioni di li chèrriti è stata priiduta puru pa la dì di Carrasciali, finz' a taldu, grazi a lu trabaddu di l'ottu fotògrafi e alti cumpagni e amichi chi ani spaltutu alti, linga e storia di Tèmpiu e la Gaddhura.

L.P.