Sa Rete Sarda Difesa Sanità Pubblica: “Tocat a torrai a organizai su Sistema Sanitàriu Sardu”

Non si morrit feti de Covid 19
21 Ladàminis 2020
rete difesa sanità sarda

In is mesis passaus, sa Rete Sarda Difesa Sanità Pubblica at abasciau sa boxi e no at fueddau prus de sa crisi de sa Sanidadi sarda. S'isperu fiat su de tenni respustas giustas a is emergèntzias de parti de sa Polìtica. Ma is cosas no funt andadas aici. “Si non si torrat a fai funtzionai su sistema sanitàriu pùblicu torrendi a organizai is ispidalis mannus de Casteddu, torrendi is ispidalis chi funtzionant a is territòrius discumbeniosus e afortiendi sa sanidadi territoliali cun su traballu de mèdicus e infermieris nous, s'arruinu betiu de cu covid 19 non si frimat”. Est cantu si ligit in sa nota de imprenta chi sa Rete Sarda Difesa Sanità Pubbblica at imbiau a is giornalis.

"Is dotoris de famìlia […] non bastant - sighit sa nota -, funt abandonaus e tenint pagus dispositivus po sa seguresa”. In pagus fueddus, a pagai funt sèmpiri is medicus de basi, chi tenint in is coddus su bisòngiu de fai tamponis lestrus. Duncas, “su riscu po is malàdius, is mèdicus e po is ispidaletus – acrat Claudia Zuncheddu, boxi de sa Rete Sarda – est su de si mudai issus etotu in tzentrus de impestu”.

In nd-un'acontessia mala meda comenti cussa pintada, is màladius non covid funt isparèssius. A mancai po su prus est sa possibilidadi de si curai. In prus, po mori de is pagus finatziamentus ingastaus po sa preventzioni, medas diàgnosi e medas curas arribant a tradu meda. "In custu cuadru pagu bellu - sutalineat ancora Claudia Zuncheddu – is cosas chi funt netzessàrias funt duas: torrai a organizai su Sistema Sanitàriu Pùblicu e pigai àterus traballadoris”.

© RIPRODUZIONE RISERVATA