Is boxis de sa sustenibilidadi ativa in su progetu " “#SeaYouNext”

Su “Flag Sardegna Orientale” pigat parti a s'initziativa e puntat s'atentzioni cosa sua a s'arregorta de is arrefudus ghetaus a mari
23 Gennàrgiu 2021
terra

Est de calencunu mesi fait s'adesioni de parti de su “Flag Sardegna Orientale” a s'initziativa istitutzionali “#SeaYouNext”, chi nascit cun sa punna de aregòlliri is boxis e is contus de una sustenibilidadi ativa.

S'atentzioni est puntada asuba de s'arregorta sustenìbili de is arrefudus ghetaus a mari. Un'arregorta chi bit is piscadoris sardus cummenti protagonistas de s'initziativa. Una parti pitica de unu progettu mannu meda, poita is FLAGS (“Fishing Litter and Abandoned Gears in Sardinia”, est a nai “Arrefudus e trastus de sa pisca abbandonaus in Sardingna”) tenint s'iscopu importanti de donai vida a unu sistema chi puntat a mellorai is cunditzionis de is àcuas de su territoriu sardu. Ddu faint donendi a is piscadoris unu compitu de importu mannu: su de atoris protagonistas in sa regorta de is arrefudus chi impestant is àcuas de su mari e chi duncas pertocant a totus. S'atentzioni massima est dedicada a sa scotzadura de is trastus lassaus in àcua de is piscagiolus. Funt, duncas, is mantessi trastus chi s'impreant po sa pisca e chi fatuvatu benint ghetaus a mari.

flagSu progetu est nàsciu pagu prus de duus annus fait, in su 2018, cummenti traballu de fai impari a s'Universidadi de is Istùdius de Casteddu chi ddu ghiat. Est unu progetu chi ponit impari is diversus Flag sardus. Difatis, cun su “Flag Sardegna Orientale”, chi tenit domu in Tortolì, nci funt su “Flag Sardegna Sud Occidentale”, cun domu in Masainas, e su Flag Pescando – Sardegna Centro Occidentale”, chi s'agatat in Crabas. Un progetu de importu, prusatotu in nd'unu momentu istòricu cummenti su chi seus bivendi, chi ponit s'arragu de s'impestu de sa plastica a su primu postu tra is apretus chi pertocant a totu su mundu. Est de pagu diris fait, difatis, s'artìculu iscientìficu bessiu in sa rivista de istùdius internatzionalis intitulada “Environmental Reserch Letters” innoia benit analizada sa saludi de su Mediterraneu. S'artìculu, chi est bessiu a pustis de unu labboratoriu asuba de su tema de s'impestadura de su mari, denuntziat nùmerus grais asuba de sa chistioni de s'abandonu de is arrefudus in is àcuas.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags