Cun sa BF is terras chi fiant de sa “Società Bonifiche Sarde” ant connotu sa sustenibilidadi

Una massarìtzia primorosa chi bendit su chi regollit in logu istràngiu puru
1 Arbili 2021
terra

Terra - Est unu tzentru mannu de massarìtzia chi impreat su metodu de s'agricultura biològica e chi traballat sa produtzioni cosa sua a manera sustenìbili. Seus fueddendi de sa sotziedadi “Bonifiche Ferraresi”, chi in Sardigna arat is terras de s'àrea ingìriu a Arborea, Marrùbiu e Terraba. Seus chistionendi de is terras chi fiant de sa “Società Bonifiche Sarde”.

Innovatzioni e sustenibilidadi funt is duus elementus chi donant vida a una realidadi produtiva de primori. Gràtzias a sa tecnologia chi caraterizat sa massarìtzia de pretzisioni, difatis, sa tanca campidanesa est intre is prendas biològicas de erbas ofitzinalis prus importantis de is territòrius chi s'agatant in s'Istadu Italianu.

Ocalitu, afàbica, erba de Santa Maria, menta, ispicu, arbioi, tzìpiri, pibireddu, limpidedda, tumbu, tzafaranu, camumilla e àteras produtzionis puru faint rica sa proposta de sa BF, chi si presentat a sa genti feti cun produtus biològicus tzertificaus.

Sa sotziedadi arat 450 ètarus de terra in totu. Dògnia ètaru fait una produtzioni de calidadi manna. Sa calidadi est acapiada a su clima de sa Sardigna e prusatotu a cussu de su Campidanu de susu. Innoi, difatis, duus elementus de importu giuant a sa produtzioni. Funt sa luxi e su bentu.

terraDògnia campu, traballau a manera sustenìbili de is massajus de sa BF, est acuau a rosiadura lèbia lèbia opuru cun tubixeddus de plastica mujadita, cussus netzessàrius a donai àcua a istìddiu a istìddiu, chi permitint de no isperdissiai s'àcua.

Non est totu. Su prus de su chi si arat si regollit a manu, sena impreai istrumentus mecànicus. Is machinas funt impitadas feti po sa regorta de sa camumilla e de s'ispicu.

Sa de sa BF est un'agricultura rica, chi po sa produtzioni de tisanas tenit un'incùngia chi est superiori a su chi abbisongiat a s'ìsula e su continenti puru. Est po custa rexoni chi totu su surplus si bendit in logu istràngiu. Un'esèmpiu? Sa ratza Etna de pibireddu tenit unu cummèrtziu importanti in Frantza e acuntessit aici etotu po ateras produtzionis puru.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22

© RIPRODUZIONE RISERVATA
Tags