Su 2 de làmpadas contra a s'ocupatzioni militari de sa Sardigna

Su movimentu contra a is basis s'at a atopai in Porto Pino
30 Maju 2021
a foras

Su movimentu contra a is basis militaris torrat a manifestai. Dd'at a fai su 2 de làmpadas chi at a benni, una data chi est istètia isceberada cun cuscèntzia poita est sa diri de sa Festa de sa Repùbbrica italiana e – si ligit in sa nota de imprenta imbiada a is giornalis de su Movimentu “A Foras – Contra a s'ocupatzione militare de sa Sardigna” – in custa data “in Sardigna non teneus nudda de afestai, poita po nosu Repùbbrica italiana bolit nai ocupatzioni militari”.

Sa manifestada de su 2 de làmpadas est aprontada de su movimentu “A Foras” impari cun s'asòtziu “Sardegna Palestina”, cun is “Madri contro l’Operazione Lince” e cun su “Cagliari Social Forum”. In custu momentu, difatis, est sèmpri prus craru ca su chi acuntessit in Sardigna est intriciau a forti cun sa polìtica internatzionali. Si ddu amostat po finas cantu est acuntessendi in Palestina po manu de Israele: “a su pòpulu de is Palestinesus, cummenti a is Kurdus e a is àterus pòpulus opressus – si ligit in sa nota - ddus atacant cun is armas impreadas de is esercitus chi agataus in domu nostra”.

S'atobiu de sa manifestada s'at a tenni in Porto Pino, acanta de su Poligonu de Teulàda, a is 11.00 de mengianu in sa zona de is parchègius.

© RIPRODUZIONE RISERVATA