“Cobas Scuola Sardegna”: manifestada contra a s'obbligu de su green pass

S'at a isboddiai cras, 8 de su mesi de cabudanni a is 10.30 de mangianu, sa manidestada aprontada de is “Cobas Scuola Sardegna” contra a s'obbligu de su green pass.

Ma ita pedint e ita proponint is sindacalistas de “Cobas Scuola Sardegna”?

Po primu cosa pedint s'abbolitzioni de s'artìculu 9 ter de su Decretu Lei nùmeru 111 de su 6 de su mesi de austu de su 2021, est a nai de su Decratu chi fueddat de su green pass in s'iscola e in s'universidadi. Ancora, si pedit chi is professoris e is àterus traballadoris de s'iscola delegaus de su Dirigenti s'arrefundint de fai controllus asuba de su green pass.

Po su chi pertocat su Collegiu de is Docentis, su sindacau pedit s'arrefudu de parti de su Collegiu de elìgiri referentis COVID cun compitus de politzia e pagaus cun su dinai de s'iscola.

Intre is rechestas ddoi at s'arrefudu de parti de is vacinaus de ammostai a su dirigenti su green pass e is tamponis saliais a indonu po is traballadoris de s'iscola chentza de green pass.

In prus de custu, si ant èssiri fertus de santzionis is “Cobas Scuola Sardegna” proponint atzionis giurìdicas a amparu de is professoris e de is àterus traballadoris de s'iscola.