“Pensare il futuro per il pianeta che speriamo”: s'UCSI Sardegna po sa sustenibilidadi
Terra – S' “UCSI Sardegna” (est a nai s”Unione Cattolica della Stampa Italiana-Sardegna”) puru fueddat de sustenibilidadi e ddu fait cun nd'unu lìbburu a incuru de Maria Paola Piccini e de Paola Springhetti. Unu traballu chi tenit comenti tìtulu “Pensare il futuro. I 17 obiettivi dell'agenda 2030 visti dai giovani e raccontati dai giornalisti”.
S'atopu “Pensare il futuro per il pianeta che speriamo” previdit pròpiu sa presentada de su lìbburu “Pensare il futuro. I 17 obiettivi dell'agenda 2030 visti dai giovani e raccontati dai giornalisti” e s'at a tenni sàbudu 13 de su mesi onniasantu a is 10.00 de mangianu in sa saba “Benedetto XVI” de su “Seminario Arcivescovile” de Casteddu.
Candu mancant feti 9 annus po lòmpiri a is 17 obietivus de isvilupu sustenìbili prevìdius de s'“Agenda 2030” (unu documentu sutascritu in 2015 de is 193 Paisus de is Natzionis Unias), s'UCSI e sa “Facoltà di Scienze della Comunicazione Sociale dell'Università Pontificia Salesiana” promòvint una circa asuba de s'“Agenda 2030”. Sa circa est divìdia in duas partis: sa primu est una circa de tipu cantidativu e cumpudat su mundu de is giòvanus po iscumbatai sa connoscètzia insoru asuba de s' “Agenda 2030”; sa segunda castiat a su mundu de s'informatzioni e sa disponibilidadi sua a fueddai de s “Agenda 2030”. No est totu. Custa parti de sa circa analizat po finas is dificultadis de is giornalistas chi depint criai interessu asuba de is temas de s'“Agenda 2030”. In prus de is arrasurtaus de is duas circas, su lìbburu proponit unus cantu cummentus de importu mannu de parti de genti arrespetada meda.
In s'atòbiu de sàbudu chi enit ant a fueddai su presidenti natzionali de su UCSI Vincenzo Varagona, su co-diretori de su giornali “Famiglia Cristiana” Luciano Regolo e puru Paola Springhetti, sa cordinadora de su lìbburu “Pensare il Futuro”. Paola Springhetti est giornalista e professora in sa “Facoltà di Scienze della Comunicazione Sociale dell'Università Pontificia Salesiana”. At a serrai s'atopu S'Archibíscamu de sa diocesi de Casteddu.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
