Cun Emy Scarpa sa bandera sarda bèntulat in s'“European Pizza Championship”

Aprofundimentu de su chenàbura - Cun Emy Scarpa sa bandera sarda bèntulat in s'"European Pizza Championship". Pro sa mastra de pitza-chef custa gara s'at a isboligare in Amburgo dae su 12 a su 14 de su mese de martzu.

Lòmpida a su de duos postos in sos mundiales de pitza a iscuadras, e lòmpida prima cun sa pitza "Queen Elizabeth" in su "Memorial Rodolfo Sorbillo", Emiliana Scarpa est pronta pro leare parte a una gara noa, est a nàrrere a su primu editzione de s'"European Pizza Championship Germany", una gara internatzionale pro mastros de pitza in programma in Amburgo. S'ocasione? Unu momentu de importu mannu, est a nàrrere sa fiera "Internorga".

Sa gara s'at a isboligare in su "Stand" B6.550, su "Stand Pizza Experience 2023".
Tocat peri a pretzisare ca cun sa punna de bìnchere sa gara, Emiliana Scarpa, chi s'at a cunfrontare cun mastros de pitza famados a livellu internatzionale, at a impreare feti sas matèrias primàrgias de Sardigna.

Pro Emiliana Scarpa, professionista de s'arte de sa pitza e de sos produtos fatos cun madrighe, s'"European Pizza Championship" rapresentat una gara importante finas pro promotzionare unos cantos progetos de solidariedade chi la bient ingimiriada. Tra custos b'at sa chirca in subra de sa "Sclerosi multipla". Emiliana Scarpa, difatis, est finas organizadora de chenas de benefitzèntzia, atividades didàticas e de recùperu in favore de sugetos chi s'agatant in situatziones difìtziles. Est ativa finas in progetos de importu pro agiudare a sos assòtzios; tra custos s'assòtziu "Sclerosi Multipla Sardegna Onlus".

Dae Napoli, pro tifare a sa mastra de pitza sarda b'at a èssere su mastru de pitza Luciano Sorbillo, fìgiu de Rodolfo Sorbillo, babbu de sa pitza chi at s'oru modde modde e cun preningiu.

Tocat a nàrrere ca Emiliana Scarpa est finas ambasciadora in su mundu de s'arte de sa pitza "made" in Casteddu. Su reconnoschimentu est lòmpidu pro sa "Festa del Gusto" de Marina Piccola in su mese de austu coladu. Sa mastra l'at otentu dae s'Assessoradu de sas Atividades Produtivas de sa Comuna de Casteddu e dae sa Presidente de sa "Commissione alle Pari Opportunità" Stefania Aloi.