Einstein Telescope, s’assessore Porcu iscriet a su Guvernu

«Cheret chi si protzedat a lestru perimetrende a minudu sas àreas interessadas e definende unu tampone de zona pro chi si èvitet su positzionamentu de impiantos èolicos» A lu nàrrere est s’assessore regionale de sa Defensa de s’Ambiente Marco Porcu in contu de sa chistione chi pertocat a un’ala su Einstein Telescope de Sos Enattos (in Lùvula) e a s’àtera s’idea de bi fàghere in cussos tretos unu parcu de rodabbentos. Ma prus chi “a lu nàrrere” devimus pònnere “a l’iscrìere”. ca cussos faeddos nche sunt in intro de una lìtera chi s’assessore matessi nch’at imbiadu a sos ministros Gilberto Pichetto Fratin (de s’Ambiente e de sa Seguresa energètica) e Anna Maria Bernini (de s’Universidade e de sa chirca). Porcu at annantu chi una rechesta ispetzìfica nch’est giai in sa mesa de s’Istitutu natzionale de fìsica nucleare ma galu sena risposta. E chi imbetzes su ministèriu de s’Istrutzione at giai pigadu positzione narende chi emmo a sa promotzione de «un’istùdiu pro averguare s’impatu de sos impiantos eòlicos giai esistentes in su territòriu».

M.P.