Plàstica: sa gherra de su Parcu natzionale de s'Asìnara, de s'Universidade e de sos piscadores

Su progetu contra a sa plàstica at sa punna de compidare s'impestadura cajonada dae s'àliga
3 Arbili 2023
aprofundimentos

Aprofundimentu de su lunis - Su Parcu natzionale de s'Asìnara, s'Universidade de Tàtari e sos piscadores decrarant gherra a sa plàstica, e lu faghent cun unu progetu chi at sa punna de compidare s'impestadura cajonada dae s'àliga.

Su progetu chi naschet dae sa conca de s'Universidade de Tàtari pro sarbare dae sa plàstica s'ìsula de s'Asìnara, at finas sa collaboratzione su Parcu natzionale, sa de s'ateneu de Ferrara, sa de s'ateneu de Bucarest, sa de s'assòtziu "Flag Nord Sardegna", sa de sa Arl de Posthudòrra , sa de "cooperativa pescatori di Stintino" e sa de sa "digital tech agency Innovou".

Su progetu incaminadu dae su dipartimentu de "Scienze umanistiche e sociali" e dae su dipartimentu de "Agraria" at a incumentzare - comente sutalìneat ANSA - cun una compidada de su "marine litter" in s'Àrea marina amparada cun s'obietivu de amparare pisca e biodiversidade. No est totu, pro ite su progetu at finas sa punna de isvilupare sa collaboratzione tra piscadores entes de chirca, amministratziones publicas e tzitadinos.


Sas iscuadras de chirca interessadas ant a traballare subra campos plùrimos. S'ant a ocupare de sas anàlisi chìmicas, cun "focus" subra sas plàsticas pro individuare sustàntzias perigulosas. Sas anàlisi ant a èssere fatas subra sos campione de "marine litter" leados in mare e in terra, fintzas a creare una prìsia de compidadas e eliminatzione de s'àliga de mare, chi dat atentzione manna a sos protzessos de "economia circolare" e a sos critèrios de anàlisi costos-benefitzios.

Tra sas initziativas prevididas dae su progetu b'at finas su fàbbricu de una "app" dislindada pro su seju de s'àliga de su mare. Sa "app" at a èssere disignada in funtzione de s'Ìsula de s'Asìnara at a èssere batijada cun su nùmene de "Sea waste finder" e s'isperimentatzione at a èssere ghiada dae un'iscuadra de chircadores e piscadores. S'isperimentatzione at a mòere s'11 de su mese de abrile pro sa "Giornata del Mare".

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras