Sos giornales de oe #011

Bonas dies! Comintzamus custa chida (santa) de mirada a sos giornales abbigende·nos chi La Nuova Sardegna mantenet sa lente sua in S’Alighera e in Terranoa, ma custa bia non pro faeddare de aeroportos (si non mentovende·los de passàgiu) ma de abitatziones.

«Afitadas a sos turistas ebbia. Non b’at prus domos». E gasi sighit sa noa in prima pàgina: «Si podet giai faeddare de emergèntzia abitativa in Terranoa e in S’Alighera, ca su mercadu de sas domos in pesone est destinadu petzi a sos turistas. Impossìbile a l’agatare finamentas unu bivanu mìseru pro chie chircat un’allogu pro totu s’annu. Sos propietàrios preferint a las afitare sos meses istiales ebbia. Fenòmenu chi est creschende, allarghende·si, e chi est interessende àteros tzentros de s’ìsula».

La Nuova faghet sos «contos in butzaca» finamentas gràtzias a sas «prataformas in lìnia chi oramai dae annos ponent trasparèntzia in su mercadu immobiliare»: «In sa Costera de su coraddu – leghimus – pro un’apartamentu de mannària modesta, 50 metros cuadros, bilocale o trilocale, tocat a nde bogare dae sos 450 a sos 500 èuros. Pro unu cuadrivanu de 80-90 metros cuadros sa tzifra pedida nch’est intre sos 600 e sos 850 èuros. In Terranoa a su presente sos prejos annuales sunt bastante in lìnia cun sos de S’Alighera: 450 èuros pro unu monolocale in Isticadeddu, 550 pro un’apartamentu de 60 metros cuadros in zona Sacra Famiglia, 750 pro unu trilocale de 65 metros cuadros in zona Bandinu. Cun unu puntu firmu: tantu in Tarranoa cantu in L’Alguer, su nùmeru de abitatziones disponìbiles pro totu s’annu est prus chi non bassu. Pro una famìlia numerosa, ma finamentas pro unu nùcleu de 4 persones, est unu problema mannu. Pro unu traballadore sìngulu in foras de sede (maistros, operajos etc.) est unu sèberu obligadu su de chircare un’aposentu in apartamentu cumpartzidu».

E faghende custa rassigna torrat a conca sola sola sa cantzone “Cant alguerès” de Adrià Mor cando narat «Massa gent sense casa. I cases sense gent. Com s’entén?».

Ma dae sas domos bòidas colemus·nche a sos sègios mesu bòidos (ca est cosa probàbile chi si cunfirment sas tendèntzias gia contadas dae IlMinuto). Mancari sos partidos apant pèrdidu s’alleàntzia prus manna issoro, sa cun s’eletoradu, acò chi L’Unione Sarda nos ponet in parte contende·nos sos acòrdios de sos cabos de sos partidos conca a sas «Eletziones antitzipadas» chi, comente leghimus in prima, sunt «una tentatzione». Su contu est a pàgina 3.

«Est dae carchi chida chi nde sunt faeddende, mancari nemos s’atrivat a pronuntziare in manera ufitziale sas duas paràulas postas paris: votu antitzipadu. S’ipòtesi b’est, e sas dies coladas l’ant sedatzada bene bene». Sigamus s’anàlisi de su giornale cun sa prima resone in favore de sa cramada eletorale atongina de ocannu: «Una solutzione che a custa diat favorèssere sa majoria atuale ca tzentrumanca e Movimento Cinquestelle non sunt galu organizados pro sas urnas e la diant finire sufrende su cantratacu».

S’àtera resone pertocat sos pidinos internos a su Psd’Az e, pro la serrare lestru, Solinas diat prefèrrere a votaremus luego, finamentas pensende a una bitzicleta: «S’àteru naro non naro essidu a campu est chi Lega e sardistas si diant presentare cun listas a cumone».

E in contu de alleados, a bisu de L’Unione, sa cumbenièntzia de Solinas votende in cabudanni est iscumproada finamentas dae sa positzione de Fratelli d’Italia. «Chimbe ant a èssere sasa regiones interessadas dae sa cramada eletorale imbeniente. In prus de sa sardigna finamentas Abrutzu, Basilicata, Piemonte e Ùmbria. Petzi in Abrutzu b’at unu guvernadore uscente de FdI, partidu chi diat pòdere disinnare de investire in àteras regiones e no in Sardigna ca, a parusu, sos chi bi sunt non torrant a bìnchere». De prus, sa ghia FdI de sa coalitzione intrea unu nùmene ebbia tenet: Paolo Truzzu. Sa nòmina sua cheret nàrrere una cosa ebbia: «custrìnghere su sìndigu de Casteddu a serrare su mandadu suo in antis de s’ora e cando chi sunt galu in òpera sas atividades de ricualificatzione de carrera de Roma chi diant dèvere fàghere sa diferèntzia pro una cunfirma eventuale de su tzentrudereta pro sas comunales».

E sos giornales italianos de ite faeddant? De àteras eletziones (finlandesas), de su Pnrr (La Stampa, Repubblica e Domani cun custu aberint, cun custu ùrtimu giornale chi tìtulat «Pianu natzionale de propaganda e vitimismu», cando chi su Corriere aberit imbetzes in contu de migrantes). In èstasi Il Giornale («Bratzos furados a sa massaria») e Libero («Mègius peri sos campos chi no in s’otomanu») movende dae sos faeddos de su ministru Lollobrigida galu faeddende de rèdditu de tzitadinàntzia. A cras.