Sos giornales de oe #026

Amus iscritu in s’aprofundimentu de eris chi s’Ìndia nch’est colende sa Tzina in contu de abitantes. Cun unu milliardu, 425mìlliones, 775mìgia e 850 persones, s’ex colònia britànnica lompet a unu primatu determinadu pro tempus meda dae polìticas de controllu de sas nàschidas prus pagu eficatzes. Tzertu, leghende sos giornales de oe sa Tzina paret chi apat su mèritu de àere abertu unu canale de comunicatzione cun s’Ucraina. Ma si cherimus abèrrere nois custa rassigna cun un’àteru sorpassu, beh, «Sa Sardigna est prima in Itàlia pro postos barca». «Sunt 21.279 – leghimus in La Nuova Sardegna –, nùmeros chi li permitint de nche colare sa Ligùria chi finas a pagu tempus a como fiat in prima positzione». Semus faeddende de imbarcatziones turìsticas, non de navios pro nche lòmpere a (o pro nche lòmpere dae) àteras terras. Pro cussu sos giornales de oe faeddant de sos aèreos. Cun su «modellu Baleares» mentovadu dae L’Unione sarda: «Sa continuidade aèrea noa est pighende forma. Pronta est sa botza de su decretu ministeriale cun iscontos pro pendolares, istudiantes, tzitadinos cun rèdditu bassu e atletas. Sa Regione est aprontende sos agiudos pro sas cumpangias chi ant a agiùnghere rotas noas». Naturale, sos disinnos guvernativos non pertocant sa Sardigna ebbia. «In su 2024 sos fundos cumplessivos pro ridùere sos isvantàgios insulares ant a èssere de 15 milliones, ma los ant a assignare cunforma a sa populatzione. Sa Sitzìlia diat dèvere retzire 10 milliones dae s’istadu. A sa Sardigna 5 milliones». Deghe, imbetzes, sunt sos milliones regionales pro sustènnere sas cumpangias. Sa dimanda est, sende chi non b’at risposta chirchende·la in in s’artìculu: cantu costat in Ispagna su “modellu Baleares”?. In su matessi tempus, e custa est s’abertura de La Nuova mancari si nde faeddet fintzas in s’Unione, sa regione est narende chi nono a sa fusione de sas sotziedades de gestione de sos aeroportos. «Non podimus cunsignare sas craes a unu fundu de investimentu», at naradu s’assessore de sos trasportos. Procurade de moderare.