In Tunisia non b’at abba. E nois timende migrantes

Aprofundimentu de su mèrcuris - Mannu est su pensamentu pro sa Tunisia. Ma s’oriolu de sos guvernantes de sas cussòrgias itàlicas est petzi pro sos migrantes chi diant pòdere lòmpere a inoghe pro more de unos cantos fatores.

In prus de sa crisi chi in cue at postu raighinas (e fintzas pro lis ghetare sas neghes de cussa crisi o pro lis nàrrere chi si b’at crisi non b’at logu) sos migrantes de un’Àfrica agigu prus a sud non sunt sos bene bènnidos in cussos tretos: unos cantos torrant a domo issoro, àteros (gente meda) atraessant su mare. E benint a ue? A ue no los cherent. E pro cussu est chi ministros e onorèvoles artzialàcanas diant chèrrere «agiudare custa natzione amiga in custu momentu de dificultade».

Traduidu: agiudos econòmicos vinculados a sos blocos de sas partèntzias. Traduidu mègius: «Bene! Bravu Kaïs Saïed, ses che a nois. Ma tene·ti·los tue sos nieddos subsaharianos».

Su chi però sos sovranistas non cumprendent est chi sa gente movet sena chi su pensu issoro lu pighent in cunsideru. O chi lu pighent cun lebiesa. Ca s’apretu binchet. Non b’at santos. E mancu abba b’at como. Ca devimus ischire chi ant comintzadu a la ratzionare sende chi b’at sicore dae ora. Sete oras cada die, dae sas 21 a sas 4 de mangianu. Iscetas assutas e peruna possibilidade, cando b’est. de l’impreare pro àteru. Dae su ministeru de sa massaria sa sentèntzia (e custu giru l’ant intzertada): neghe de su clima mudadu. Sos massajos tunisinos contende sunt. E contende nos sunt chi ant collire in mancu: unas 500mìgia tonnelladas de gràtzias de Deus, in mancu. Totu custu lassende·nche a banda sa calidade de sas infrastruturas tunisinas, cun abba pèrdida e cun calidade chi lassemus pèrdere finamentas custa chistione. Est craru tando ite tipu de agiudos bi diant chèrrere pro una «natzione amiga»? Ca si los agiudamus petzi pro chi non movat gente semus agiudende ebbia a chie lis impedit de mòvere.