Birra e paesàgiu in su lagu de Gùsana

 Aprofundimentu de su chenàbura - Birra e paesàgiu in su lagu Gùsana de Gavoi in ue s'afestat sa birra màstrina de Sardigna.

In Gavoi ant a èssere sete sos birrifìtzios sardos protagonistas de sa de primu editzione de su "BeerBagia Festival", su fèstival chi s'isbòligat dae su 27 a su 28 de su mese de maju.

Su "BeerBagia Festival" naschet dae sa conca de s'assòtziu culturale de Gavoi "Beerbagia", chi at traballadu in collaboratzione cun sos assòtzios de sa bidda "Lakana_del mondo", "cittadini" e cun s'assòtziu "Pro Loco". Sa collaboratzione però essit finas dae sas làcanas de sa Gavoi, difatis s'illargat in Ovodda cun s'assòtziu"Sonàla" e in Lodine cun sa "Consulta giovanile" e lompet fintzas sa "Fondazione per la ricerca sulla fibrosi cistica -- ETS". "Partner" de su Fèstival, imbetzes, est "charity", chi at a èssere presente in Gavoi cun unu "stand" pro promotzionare su progetu "#CorrerePerUnRespiro".

Sa "location" isseberada pro su Fèstival de sa birra est su portigheddu turìsticu, chi cun sos "stand" de sos birrifìtzios màstrinos s'at a mudare in àrea pedonale. De ogni manera non b'ant a èssere birrifìtzios feti, ma finas "stand" de màndigos, "stand" de produtos "agrualimentares" e "stand" de artesanadu.

No est acabada inoghe, pro ite in su "BeerBagia Festival" b'ant a èssere finas mùsica, "dj set" e fainas pensadas pro sos pitzinnos.

Ant a leare parte a sa festa de sa birra sos birrifìtzios: "Centoteste" de Tortolì, "Horo" de Sedilo, "Marduk" de Orosei, "Mezzavia" de Ceraxius, "Nanumoru" de Seddori, "Isola" de Tiesi, "Trulla" de Nùgoro.

In programma bi sunt finas addòbios, laboratòrios de tastos e unu cunvegnu dedicadu a sa realidade brassicola de Sardigna. A faeddare de birra ant a èssere Luca Saba de "Coldiretti - Consorzio Birra Italiana", Luca Pretti de "Porto Conte Ricerche", sos rapresentantes de s' "Agricola Brass" e sos rapresentantes de su "Birrificio Agricolo Marduk".