Cunvertidu in lege su “decretu Cutro”

Contra a sos iscafistas o contra a sos migrantes?
3 Maju 2023
aprofundimentos

Aprofundimentu de su mèrcuris  - Sa Càmera de sos deputados at aprovadu sa cunfiàntzia a sa cunversione in lege de su chi connoschimus comente “decretu Cutro”, su decretu aprovadu in contu de gestione de sos flussos migratòrios a pustis de su degòlliu de sos concruos de freàrgiu in tretos de sas costeras calabresas de Steccato di Cutro.

Sende chi fiat unu decretu lege, cunforma a sas normas costitutzionales, su guvernu aiat 60 dies de tempus pro lu cunvertire, contende cussas dies dae sa de publicatzione de su testu mentovadu in sa Gazzeta ufficiale. E, sende chi semus in regime bicamerale, su passàgiu cheret fatu in ambas cambas de su Parlamentu italianu. Su Senadu si fiat giai espressadu cun carchi emendamentu. Ma pro sa Càmera, sigomente su guvernu Meloni at postu sa “fiducia”, non b’at àpidu possibilidade de mudare galu su testu.

In su decretu, est cosa chi ischimus, b’at penas prus graes pro sos cristianos chi cherent lòmpere a inoghe traessende su mare e chi, pro sa lege, sunt irregulares. Àteras pones milli impèigos pro sos chi cherent abarrare, una bia lòmpidos. Duas sas medidas printzipales, comente annuntzieint cando chi fiant faeddende de chèrrere tènnere sos iscafistas peri su globu terràcueu intreu (non sunt istados capatzes de los sarvare a pagas nadadas...): sa prima pertocat su reatu nou de «morte o lesiones comente cunsighèntzia de delitos in contu de immigratzione clandestina» cun cundennas dae sos 20 a sos 30 annos de galera. Su fatu est chi iscafista podet èssere unu migrante etotu chi, in cussu momentu est ghiende su naviu. Unu migrante che a sos àteros e no unu traficante. Sa segunda pertocat sa “protetzione ispetziale” chi finas a como fiat una garantzia in prus. Su guvernu narat chi fiat cosa chi non b’est in su restu de Europa, però cando s’Europa narat de abèrrere sas garas pro sos istabilimentos balneares tando su restu de su continente non contat.

© RIPRODUZIONE RISERVATA

Aprofundimentos

Attività realizzata col contributo della Regione Sardegna - IMPRENTAS 2022-2023. LR 22/2018, art. 22

Image
ras