Eletziones in Grètzia. Premiados sos guvernantes uscentes

Male sa manca alternativa. Sos eletores no l’ant bida comente un’alternativa
22 Maju 2023
parlamentu grecu

Sa manca de Syriza mustreit de no èssere un’alternativa cando, guvernende, nargeit chi non b’aiat alternativa a sos diktat europeos e a sos memorandum.

Como at mustradu de no lu èssere nemmancu dae s’opositzione ca sos eletores grecos ant torradu cunfiàntzia a sos guvernantes uscentes dende a Nea Demokratia su 40% e barda (carchi cosa de prus de su 2019). Su dòpiu de sos votos de Syriza. E si Syriza no at cumbìnchidu, s’impresa no est resèssida nemmancu a duos ex cumpàngios de Tsipras: Zoi Konstantopoulou (s’ex presidente de su parlamentu chi a tempus suo s’espresseit contra a su memorandum) e Yannis Varoufakis (s’ex ministru de sas Finàntzias chi no atzeteit sa traitoria de Syriza a pustis de su “Oxi” a su referendum contra a sa troika cummissione europea-Bce-Fmi). Nemos de custos duos nch’at barigadu su lìmite mìnimu de votos pro nch’intrare a sa Càmera de pratza de Syntagma. E custa Syriza pasokizada at postu paritzos eletores cara a unu sèberu.

De custa manera, cun una mèngua de prus de 10 puntos pertzentuales, in medas ant chertu votare s’originale: sos sotzialistas creschent de tres puntos e colant dae s’8,10 a s’11,50. Creschent fintzas sos comunistas de su Kke, dae su 5,3 a su 7,2%. Sa manca in totu leat 38,9%, belle 2 puntos in mancu de Nd a sa sola. Ma si a custa b’annanghimus sos votos de estrema dereta de Elliniki Lysi (Solutzion egreca) sa tzifra in cussa ala nche lompet a su 45,3%. Ma Nd cheret guvernare sena s’alleare, e duncas punnat a eletzione noas luego pro otènnere sos 151 iscrannos chi li serbint.

m.p.

immàgine creative commons, deretos Alexander Savin

© RIPRODUZIONE RISERVATA