Sos giornales de oe #030

Bonas dies. Ma a bias paret chi sas noas siant semper sas matessi. Che a sa de oe cun sos sìndigos de sos Comunes costerinos chi timent s’assàchiu de sos turistas istiales e de no los ischire gestire. «S’arriscu est s’overtoursim (alè, ndr), sa presèntzia subrabbundante de turistas atropelliados in pagos meses in sos Comunes balneares». S’assessore regionale Chessa nât chi cumprendet, ma chi «tocat a carrare gente». In su matessi giornale, semus faeddende de La Nuova Sardegna, b’at finamentas una projetzione pro su 2031, cando in custa terra s’ant a contare 46mìgia istudiantes in mancu, in sas iscolas. S’allega est torra sa de sa denatalidade (ammesturada cun sa de dispersione). Chi cada tot dies torrat. Como immaginemus·nos·la una terra de iscolas bòidas e de costera assachiadas. E non de costeras ebbia. Ca si colamus a L’Unione sarda podimus lèghere de s’annestru bèllicu de sa Nato chi mancu s’abba nos còmporat (78mìgia èuros pro nche catzare su sidis a sos militares si nche los pigat una dita italiana), de su mitu infadosu (peus de saperi e sapori) de sos tzentenàrios chi no abarrat prus ritzu (semper chi lu fiat finas a como), de sos repartos de Oncologia chi non dant sas rispostas chi diant dèvere dare a sos malàidos. Bi diat essire unu programma de cambiamentu radicale pro custa terra, movende dae custos problemas, dae custos bisòngios, ma in sa Nuova sos guvernantes chi non nch’ant catzadu su tzilibirche ant in oriolu sa leadership conca a sas regionales. Non faeddemus de s’opositzione. In Itàlia sos problemas non sunt de mancu. Pro nàrrere, in contu de giòvanos e de istudiantes su Sole 24 ore aberit narende «fraigare una filera formativa pro garantire su benidore». Gasi etotu La Stampa: «Traballu, s’Itàlia est contra a sos giòvanos». e su Secolo XIX («Giòvanos semper prus pòberos»). Ma in cue puru sunt pensende a sas riformas istitutzionales intre presidentzialismu e premieradu (Corriere e repubblica). E in cue puru sa sanidade in crisi manna: «Mèigos fuende dae sos ospidales», tìtulat Il Messaggero.