Sos giornales de oe #28

Polìgonos tzocados e perìmetros mudos
4 Maju 2023
sos giornales de oe

Bonas dies. Aberimus oe sos giornales sardos su continu de su contu aeroportuale chi non pertocat ebbia sos iscalos de S’Alighera, ma fintzas su de Casteddu. S’allega nch’est lòmpida a Consìgiu regionale e tenet finamentas isvilupos legales cun sos avocados de su fundu F2i chi ant difidadu a s’assessore regionale. Sa rechesta? Sas de non fàghere «àteras decraratziones» e «de no acumprire a initziativas ulteriores chi potzant cajonare pregiudìtziu a s’assistida nostra».

Ma àteru b’at, e pertocat s’Einstein telescope de Lùvula. Ca su guvernu, pro mèdiu de una norma in intro de su decretu Pnrr, non blocat s’eòlicu ebbia in cussos tretos, ma unos cantos vìnculos pro àteras atividades e in intro de un’àrea prus manna meda. Degheoto sos Comunes interessados in prus de Lùvula: Benetuti, Bitzi, Buddusò, Durgali, Garteddi, Irgoli, Lòcula, Lodè, Nule, Nùgoro, Onanie, Orune, Osidde, Padru, Patada, Thiniscole, Torpè e Ulìana (in Olanda, cun su progetu cuncurrente, su perìmetru est prus minore. B’at cuntierra, comente leghimus in sos giornales, ca s’assessore regionale Saiu (leghimus in s’Unione) narat chi non bi dênt àere impèigos a s’isvilupu econòmicu a inghìriu de su situ, petzi chi «sos tìtulos abilitativos los ant dare sas amministratziones cumpetentes “a cuncordu” cun su ministeru de s’Universidade e una bia intesu su pàrrere de s’Istitutu de fìsica nucleare». In s’Unione podimus agatare sos timores de Confindustria e in sa Nuova faeddat finamentas su sìndigu de Patada. In ambos su parlamentare Pd Silvio Lai. Ma b’at una chistione. Su «silenzio» a inghìriu de su situ chi mentovat Saiu, non paret sa mancàntzia de dudas pro unu progetu chi in un’ìsula torrada a nudda e prus chi non “tzocada”? Mancari s’Et si presentet bene e cosa bona siat, non paret chi su de si nche ghetare a cuncordu in custu progetu rapresentet una mancàntzia de prospetivas de sa polìtica sarda?

© RIPRODUZIONE RISERVATA