Sos giornales de oe #043

Si sighimus sos inditos de Toninu Rubattu, vocabulàriu chi non podet mancare in sa libreria de sos chi traballant cun su sardu, pro “vespasiano” b’amus sos faeddos còmudu, pisciadorzu (pissiadorju, pisciadroxu), cacadorju, belledda e, a concruos, bassa, dae su catalanu. Abarremus cun custu ùrtimu sèberu ca semus faeddende de “vespasiani” de s’Alighera. E ca s’arresonu movet dae sos faeddos de su sìndigu Conoci («sa gestione privada est de prefèrrere a sa regionale chi in su tempus at mustradu crititzidades»). Acò a s’assessore regionale Moro, torrende·li su mutu, mentovende su chi amus chircadu in su Rubattu. Su chi at naradu Moro est in parte prus delicadu in parte nono de àteras essidas cun su «Se...» chi caraterizant sa cuntierra polìtica (do you remember su sìndigu de Terranoa in Consìgiu comunale narende «Sidd’érami stati tonti come te a chist’ora érami tutti molti»?). E tando pighemus sa frase de Moro bene bene virguletada in ambos sos giornales sardos chi agatamus in edìcula: «Si diamus dèvere protzèdere cun sa privatizatzione de totu sos servìtzios chi sas amministratziones non gestint bene, creo chi in s’Alighera non si diant sarvare nemmancu sas bassas». E totu custu ca Conoci, de su matessi partidu de Moro e, est de acordu cun sa fusione de sos aeroportos pro more de su fundu F2i. Cantu custas cuntierras internas a su partidu de su guvernadore potzant cajonare movimentos pro sas candidaduras est chitzo a lu nàrrere ma est finamentas fàtzile. Pro gasi, nemos a manca chi nàrgiat «sa gestione pùblica est de prefèrrere a sa de sos privados chi in su tempus at mustradu crititzidades». Che chi nch’esserent piscende in foras...de sa bassa.